जेव्हापासून लोकप्रिय टीव्ही अभिनेत्री हिना खानने स्तनाच्या कर्करोगाने ग्रस्त असल्याचे जाहीर केले आहे, तेव्हापासून सर्वत्र काळजीच वातावरण पसरलं आहे. सगळ्या क्षेत्रातून अभिनेत्रीला धीर देत आहेत. अनेक कलाकारांनीही हिना खानला आशीर्वादही दिले आहेत आणि तिला काळजी न करण्याचे आवाहन केले आहे. हिना खानने २८ जूनला सांगितले की, ती ब्रेस्ट कॅन्सरच्या तिसऱ्या स्टेजमध्ये आहे. हिनाने असेही सांगितले की ती मजबूत व खंबीर असून हा लढा देत आहे. आणि आता ती पूर्णपणे ठीक आहे. यावर मात करण्यासाठी ती सर्व काही करण्यास तयार असल्याचेही हिना खानने सांगितले. (Actress Hina Khan Health Update)
हिना खानने तिच्या इंस्टाग्राम अकाउंटवर ब्रेस्ट कॅन्सरची बातमी जाहीर केली होती आणि त्या पोस्टवर अनेक कलाकारांनी प्रतिक्रिया दिल्या होत्या. अंकिता लोखंडे, एकता कपूर, मौनी रॉय, दृष्टी धामी, जेनिफर विंगेट, शहनाज गिल, महिमा चौधरी, श्रद्धा आर्य, सुरभी ज्योती, भारती सिंग, आमिर अली आणि गौहर खान यांच्यासह अनेक कलाकारांनी कमेंट करत हिना खानला धीर दिला आणि तिला लवकर बरे होण्यासाठी प्रार्थना केली आहे.
अंकिता लोखंडेने हिनाच्या या पोस्टवर लिहिलं आहे की, “हिना तू यापेक्षाही मजबूत आहेस. ही वेळही निघून जाईल. तुम्हाला खूप प्रेम पाठवत आहे. देव तुमचे भले करो”. तर आमिर अलीने लिहिले आहे की, “तू खूप मजबूत आहेस. तुम्हाला काही हवे असल्यास, फक्त एक कॉल करा”. बॉलीवूड अभिनेत्री महिमा चौधरी हिने स्वतः ब्रेस्ट कॅन्सरशी लढाई जिंकली आहे. तिनेदेखील हिना खानला धीर दिला आणि लिहिले, “हिना, मी तुला खूप प्रेम व धैर्य पाठवत आहे. तू एक सेनानी आहेस आणि मला माहित आहे की तू ठीक होशील. लाखो लोकांच्या प्रार्थना तुमच्या पाठीशी आहेत. या कठीण काळात मी तुझा हात धरीन”.
याआधी हिना खान एप्रिल २०२४ मध्ये आजारी पडल्याची माहिती आहे. त्यानंतर तिने इंस्टाग्रामवर एका पोस्टमध्ये सांगितले की ती अनेक आरोग्य समस्यांशी झुंजत आहे.