हिंदी मालिकांमधील लोकप्रिय अभिनेत्री म्हणजे दृष्टी धामी. ‘गीत’ या मालिकेतून तिला हिंदी मालिकाविश्वात एक वेगळी ओळख मिळाली. आजवर तिने अनेक मालिकांमध्ये महत्त्वपूर्ण भूमिका साकारल्या आहेत. ‘मधुबाला’ या मालिकेमध्ये तिने साकारलेली भूमिका आजही सगळ्यांच्या लक्षात आहे. दृष्टी सध्या खूप काळापासून अभिनयापासून दूर आहे. मात्र सोशल मीडियावर मोठ्या प्रमाणात सक्रिय असते. मालिकांमध्येच काम करत असताना ती नीरजबरोबर लग्नबंधनात अडकली. आता लग्नाच्या ९ वर्षांनंतर तिच्याबद्दलची एक महत्त्वाची अपडेट समोर आली आहे. (drashti dhami pregnancy )
मालिकांमध्ये आपला एक वेगळा ठसा उमटवणारी अभिनेत्री आता लवकरच आई होणार असल्याची माहिती चाहत्यांना दिली आहे. दृष्टी लग्नाच्या नऊ वर्षानंतर तिने आई होणार असल्याचे सोशल मीडियाद्वारे चाहत्यांना सांगितले आहे. याबद्दल तिने एक व्हिडीओ शेअर केला असून तिचा पतीदेखील दिसून येत आहे.
या व्हिडीओमध्ये दृष्टी व पती नीरज एकत्र उभे असून खूप खुश असलेले दिसत आहेत. त्यांच्या हातात एक पोस्टर आहे. त्यावर ‘गुलाबी असू शकतो किंवा निळा असू शकतो. पण आम्ही खूप खुश आहोत. ऑक्टोबर २०२४. आम्हाला आशिर्वाद, प्रेम, कॅश व फ्रेंच फ्राइज पाठवत राहा”. त्यांच्या या व्हिडीओमध्ये दृष्टीचे संपूर्ण कुटुंब दिसून येत आहे.
त्यांच्या या व्हिडीओला चाहत्यांनी व कलाकारांनीही खूप पसंती दर्शवली आहे. अभिनेत्री कृती कामरा, रुबिना दिलैक, करण ग्रोव्हर, हिना खान यांनी प्रतिक्रिया दिल्या आहेत. रुबिनाने प्रतिक्रिया देत म्हंटले की, “माझ्याकडे नवीन बाळासाठी लागणाऱ्या सर्व गोष्टी मिळतील”. तसेच इतरांनी शुभेच्छांचा वर्षाव केला आहे.
दृष्टी २१ फेब्रुवारी २०१५ साली नीरज खेमकाबरोबर लग्नबंधनात अडकली. तिच्या लग्नासाठी कुटुंब, मित्रपरिवार व कलाकार असे सगळे उपस्थित होते. सोशल मीडियावर ती अनेकदा पती व कुटुंबाबरोबरचे फोटो शेअर करत असते. आता बाळाच्या येण्याच्या बातमीने तिच्या चाहत्यांनाही खूप आनंद झाला आहे.