‘झी मराठी’ वाहिनीवरील ‘नवरी मिळे हिटलरला’ ही मालिका प्रेक्षकांच्या पसंतीस पडत आहे. अल्पावधीतच या मालिकेच्या कथानकाने प्रेक्षकांच्या मनात घर केलं. या मालिकेत एजे व लीला यांचा अनोखा प्रवास पाहायला मिळत आहे. या मालिकेला चांगला प्रतिसाद मिळत असताना मालिकेतील एका अभिनेत्रीवर दुःखाचा डोंगर कोसळला आहे. मालिकेत फाल्गुनी हे पात्र साकारणाऱ्या अभिनेत्रीच्या आईचे निधन झाले आहे. अभिनेत्री धनश्री भालेकरने एक पोस्ट शेअर करत याबद्दलची माहिती दिली आहे. पोस्ट शेअर करत धनश्री खूपच भावुक झालेली पाहायला मिळाली. (Dhanashree Bhalekar Mother Death)
धनश्रीची आई गेल्या काही दिवसांपासून आजारी होती. काही दिवसांपूर्वी त्यांच्या प्रकृतीत बिघाड झाल्याने त्यांना आयसीयूमध्ये दाखल करण्यात आले होते. अभिनेत्रीने आईच्या तब्येतीत सुधारणा व्हावी, यासाठी चाहत्यांना प्रार्थना करण्याचे आवाहन केले होते. पण अखेर तिच्या आईची मृत्यूची झुंज अपयशी ठरली. धनश्री भालेकरच्या आईचे १८ एप्रिलला निधन झाले. तिने इन्स्टाग्रामवर एक भावूक पोस्ट शेअर केली आहे.
धनश्रीने ही पोस्ट शेअर करत असं म्हटलं की, “आई. मी तुला खूप मिस करत आहे गं. आज ८ दिवस झाले पण मला अजूनही हे मान्यच करता येत नाही आहे की तू आमच्यात नाही आहेस. मला तुझी खूप गरज आहे. आई मी खूप एकटी पडले आहे. माझ्याशी बोलायला, शेअर करायला कोणीच नाही. मला तू हवी आहेस. मी तुझ्याशिवाय राहू शकत नाही. तुझं नसणं म्हणजे माझ्यामधील एक भाग वगळल्यासारखं आहे. माझ्या आयुष्यातील प्रेरणा हरवली आहे. तुझ्याशिवाय खूप अपूर्ण वाटत आहे. तुझं सगळं किती विशिष्ट आहे. मी तुझी पूर्णता आणि सुपर स्वच्छता खूप मिस करत आहे. मला तुझ्याबरोबर खूप बोलायचं आहे. मी सगळं कोणाला सांगू, कोणाबरोबर गप्पा मारत बसू? अजूनही असं वाटत आहे की तू आहेस”.
यापुढे तिने लिहिलं आहे की, “क्रिकेट मॅच बघताना खुश होशील, सगळ्या मालिकांच्या स्टोरी मला घरी आल्यावर सांगशील. किचनमधून माझा आवडता पदार्थ बनवून मी बाहेरुन घरी आल्यावर मला खायला देशील. घराबाहेर पडताना बाय करायला दाराबाहेर वा खिडकीत येशील. मला तुझी खुप आठवण येत आहे. तुझ्याशिवाय काय करावं मला सुचत नाही आहे. मला माहिती आहे तू ऐकत आहेस, बघत आहेस, तुझं माझ्यावर लक्ष आहे. तुला दिलेल्या कमिटमेंट आणि तू पाहिलेली स्वप्नं प्रत्यक्षात आणण्यासाठी पूर्ण प्रयत्न करेन. तू आता जिथे आहेस तिथून मला आशीर्वाद दे आणि तू तूझी काळजी घे. प्रत्येक जन्मात माझी आई म्हणून तूच ये. खूप खूप प्रेम. लव्ह यु आई”.
