सोशल मीडियावर मराठी ट्रेंडिंग गाण्यांची चांगलीच चर्चा रंगलेली पाहायला मिळत असते. सध्या मराठी गाण्यांची क्रेझ या रीलवर अधिक प्रमाणात असलेली पाहायला मिळत आहे. सध्या एक मराठमोळं गाणं रीलवर ट्रेंड झालं असून केवळ महाराष्ट्रातच नव्हेतर जगभरात या गाण्याची क्रेझ असलेली पाहायला मिळत आहे. हे गाणं म्हणजे ‘गुलाबी साडी’. प्रेक्षकांना संजू राठोड व प्राजक्ता घाग यांच्या ‘गुलाबी साडी’ या गाण्याने वेडं लावलं आहे. एवढंच नाहीतर माधुरी दीक्षित, रेमो डिसुझा यांच्यासह विविध कलाक्षेत्रातील मंडळींना या गाण्याची भुरळ पडली आहे. (Kili Paul On Trending Song)
सोशल मीडियावर अनेकजण या ट्रेंडिंग गाण्यावर रील करताना दिसत आहेत. अशातच टांझानियाच्या किली पॉललाही या गाण्याची भुरळ पडली आहे. किली पॉलच्या व्हिडीओने साऱ्यांचं लक्ष वेधून घेतलं आहे. त्याने चक्क ‘गुलाबी साडी’ हे मराठी गाणं गात त्यावर ठेका धरला आहे. त्याचा हा व्हिडीओ सोशल मीडियावर चांगलाच चर्चेत आला आहे.
सध्या सोशल मीडियावर किलीच्या बऱ्याच मराठी गाण्यांच्या व्हिडीओंची चर्चा होताना दिसते. “काय सांगू राणी मला गाव सुटना”, “मावळं आम्ही वादळ आम्ही”, “नांदण नांदण रमाचं नांदण” या मराठी गाण्यांबरोबरच किलीने त्याची बहिण नीमाबरोबर ‘बहरला हा मधुमास नवा’, ‘एका वाघाची शिकार एका हरणीने केली’ या मराठी गाण्यांवर ठेका धरतानाचे व्हिडीओ सोशल मीडियावर शेअर केले होते, या त्याच्या रीलला सोशल मीडियावर उत्तम प्रतिसादही मिळाला होता. त्यानंतर आता त्याच्या ‘गुलाबी साडी’ गाण्याला पसंती मिळत असून या व्हिडीओने लाखोंचा टप्पा पार केला आहे.
सोशल मीडिया स्टार किली पॉल हा बराच लोकप्रिय आहे. त्याचे सोशल मीडिया अकाउंटवर लाखो फॉलोअर्स आहेत. बरेचदा तो बॉलिवूड गाण्यांचे लिप्सिंग करताना वा गाण्यावर थिरकतानाचे व्हिडीओ शेअर करत असतो. चाहते देखील किली पॉलच्या प्रत्येक व्हिडीओला भरभरुन प्रतिसाद देताना दिसतात. यावरुन किली ही मराठी गाण्यांच्या प्रेमात पडला असल्याचं कळतंय.