Prathamesh Parab Kshitija Ghosalkar Marriage : गेल्या काही दिवसांपासून मराठमोळा अभिनेता प्रथमेश परबच्या लग्नाची जोरदार चर्चा सुरु होती. दरम्यान, प्रथमेश परबच्या घरीही लगीनघाई सुरु असलेली पाहायला मिळाली. त्याच्या लग्नापुर्वीच्या विधींच्या फोटोंनीही सोशल मीडियावर अक्षरशः धुमाकूळ घातला होता. यानंतर आता अखेर प्रथमेश परब बोहोल्यावर चढला आहे. प्रथमेश परब व क्षितिजा घोसाळकरचा शाही विवाहसोहळा संपन्न झाला आहे. दोघांच्या लग्नसोहळ्याचे अनेक फोटो व व्हिडीओ समोर आले आहेत.
प्रथमेश परब व क्षितिजा घोसाळकर ही जोडी नुकतीच लग्नबंधनात अडकली आहे. दोघांनी त्यांच्या आयुष्यातील एका नव्या प्रवासाला सुरुवात केली आहे. अभिनेत्याने स्वतः लग्नाचे फोटो सोशल मीडियावर शेअर करत ही आनंदाची बातमी जाहीर केली आहे. लग्नाचे फोटो शेअर करत प्रथमेशने लिहिलं आहे, “अखेर लॉकडाऊन लव्हस्टोरीचे हृदय कायमसाठी लॉक झाले”. या लग्नाच्या फोटोंमध्ये दोघंही फार सुंदर दिसत असून खूप आनंदात पाहायला मिळत आहे. लग्नासाठी दोघांचा खास पारंपरिक लूक लक्षवेधी ठरला.
लग्नात क्षितीजाने पिवळ्या रंगाची नऊवारी साडी नेसली होती, ज्यावर गुलाबी रंगाची शाल घेतली होती. तसेच प्रथमेशने पांढऱ्या रंगाचा सदरा घातला होता आणि बायको क्षितीजाला मॅचिंग करण्यासाठी त्याने गुलाबी रंगाची धोती परिधान केली होती. याशिवाय प्रथमेशने गुलाबी व पिवळ्या रंगाचा फेटाही बांधला होता. तसेच क्षितिजाच्या मोत्याच्या दागिन्यांनीही खास लक्ष वेधून घेतले होते. दोघांचा हा मराठमोळा पेहराव पाहून अनेकांनी त्यांचं कौतुक केलं आहे.
प्रथमेश व क्षितिजा यांच्या लग्नातील विशेष बाब म्हणजे बाशिंग. आजकालच्या काळात लग्नसोहळ्यात वधूवराला मुंडावळ्या बांधण्याची पद्धत आहे. मात्र, आधीच्या काळात मुंडावळ्या ऐवजी बाशिंग बांधलं जायचं. काही जणांकडे फक्त मुंडावळ्या असतात. तर काही जणांकडे बाशिंग बांधण्याची पद्धत आहे. बाशिंगाच्या डोक्यावर मोठा तुरा असतो. काही विशिष्ट लोकांकडेच हा बांधला जातो. अशाप्रकारे अगदी पारंपरिक व जुन्या चालीरीतींना प्राधान्य देत प्रथमेश व क्षितिजा यांनी बाशिंग बांधलेलं पाहायला मिळालं. दोघांच्या लूकच भरभरून कौतुक होत असून दोघांवर शुभेच्छांचा वर्षाव होत आहे.
