बॉलिवूड अभिनेत्री शिल्पा शेट्टी हिने पंतप्रधान नरेंद्र मोदी यांना लिहिलेल्या एका खास पत्रामुळे ती चर्चेत आली आहे. २२ जानेवारी रोजी पार पडलेल्या राम मंदिराच्या विशेष सोहळ्याचे औचित्य साधून तिने हे कौतुकाचे पत्र लिहिले आहे. या पत्रामध्ये “प्रत्येक भारतीयाचे स्वप्न तुमच्यामुळे साकार झाले असून याबद्दल आम्ही तुमचे आभारी आहोत” असं म्हटलं आहे. शिल्पा शेट्टीचे हे पत्र भारतीय जनता पक्ष (महाराष्ट्र) च्या एक्सद्वारे (पूर्वीचे ट्विटर) शेअर करण्यात आले आहे. शिल्पाने या पत्रामध्ये मोदीजींचे अयोध्या मंदिरासाठी आभार मानले आहेत.(shilpa shetty letter to PM Modi)
वर्षाच्या सुरुवातीलाच ऐतिहासिक राममंदिराचा प्राणप्रतिष्ठा सोहळा पार पडला. विविध क्षेत्रातील अनेक दिग्गज लोकांनी या सोहळ्याला हजेरी लावली होती. देशातील प्रत्येक रामभक्त हा सोहळा साजरा करत होता. त्यामुळे लोकांच्या भावना गहिवरून आल्या होत्या. प्रत्येक भारतीयाची ही भावना लक्षात घेता शिल्पाने मोदीजींना आभारपूर्वक असे पत्र लिहिले. या पत्राद्वारे तिने असं म्हटलं आहे की, ” आदरणीय मोदीजी, काही लोक इतिहास वाचतात. काही लोक इतिहासातून शिकतात. पण तुमच्यासारखे लोक इतिहास बदलतात’. तुम्ही रामजन्मभूमीचा ५०० वर्षांचा इतिहास बदलला आहे. त्यासाठी मनापासून धन्यवाद. तुमच्या या शुभकार्याने तुमचे नाव भगवान श्रीरामाच्या नावाशी कायमचे जोडले गेले आहे. नमो राम! जय श्री राम!”
शिल्पाच्या या पत्रामुळे इतरांनीदेखील पंतप्रधान मोदी यांचे आभार मानले आहेत. भारतात मोदी सरकारमुळे अनेक सकारात्मक बदल झाले आहेत. आगामी काळात देखील मनोरंजन, अध्यात्म, व्यवसायासाठी अनेक संधी उपलब्ध होतील अशा सर्वांनाच आशा आहेत. राममंदिराचा विषय हा अनेक वर्षांपासून प्रलंबित होता. आयोध्येमध्ये रामाचे मंदिर असावे असे सर्वांचेच मत होते. २०१९ ला राममंदिराच्या बाजूने निकाल लागल्यानंतर मंदिर बांधकामास सुरुवात झाली व सरतेशेवटी २२ जानेवारी २०२४ रोजी मंदिराचे लोकार्पण करण्यात आले.
आणखी वाचा- ‘सिंघम अगेन’ चित्रपटातील अर्जुन कपूरचा खतरनाक लूक आला समोर, दिसणार ‘या’ खास भूमिकेत
या सोहळ्याला अरुण गोविल, सुनील लाहिरी, दीपिका चिखलिया, अमिताभ बच्चन, रजनीकांत, अभिषेक बच्चन, रणबीर कपूर, आलिया भट्ट, विक्की कौशल, कतरिना कैफ, अनुपम खेर, विवेक ओबेरॉय, हेमा मालिनी, रोहित शेट्टी, माधुरी दीक्षित नेने, राजकुमार हिरानी, कैलाश खेर, राम चरण, मनोज जोशी यांसह अनेक कलाकार उपस्थित होते.