२०११ मध्ये रोहित शेट्टीचा ‘सिंघम’ हा चित्रपट प्रदर्शित झाला होता. बॉक्स ऑफ़िसवर या चित्रपटाने अक्षरशः धुमाकूळ घातला. त्यानंतर ‘सिंघम’ चित्रपटाचा दूसरा भाग ‘सिंघम रिटर्न’ प्रदर्शित झाला होता आणि या चित्रपटालाई प्रेक्षकांनी तूफान प्रतिसाद दिला. अशातच आता ‘सिंघम’चा तिसरा भागही लवकरच प्रदर्शित होण्याच्या मार्गावर आहे. रोहित शेट्टीने नुकतीच ‘सिंघम’चा तिसरा भाग असलेल्या ‘सिंघम अगेन’ची घोषणा केली. ही घोषणा करताना चित्रपटातील विविध व्यक्तिरेखांची पहिली झलक सोशल मीडियावर शेअर करण्यात आली. आतापर्यंत या चित्रपटातील अक्षय कुमार, दीपिका पदुकोण, टायगर श्रॉफ यांचे फर्स्ट लूक चाहत्यांसमोर आले आहेत. अशातच आता चित्रपटामध्ये खलनायक साकारणाऱ्या अर्जुन कपूरचा फर्स्ट लूकही नुकताच प्रदर्शित करण्यात आला आहे. अर्जुन कपूरच्या या अनोख्या लूकने साऱ्यांचेच लक्ष वेधून घेतले आहे. या लूकमध्ये अर्जुनचा रक्ताने माखलेला चेहरा दिसत आहे. त्यामुळे त्याच्या लूकवर कलाकार मंडळींसह नेटकऱ्यांनी अनेक प्रतिक्रिया दिल्या आहेत. (Arjun Kapoor Singham again first look )
चित्रपटाचे दिग्दर्शक रोहित शेट्टीने सोशल मीडियावर दोन फोटो अपलोड केले आहेत. त्यातील पहिल्या फोटोमध्ये अर्जुन कपूरच्या हातात हत्यार असून त्याच्या चेहऱ्यावर रक्त व भयंकर हास्य हे थरकाप उडवणारे चित्र पाहायला मिळत आहे, तर दुसऱ्या फोटोमध्ये रणवीर व अर्जुन एकमेकांकडे सूचकात्मक बघताना दिसत आहेत. हे फोटो अपलोड करुन त्यावर त्याने, “माणूस चूक करतो पण त्याची त्याला शिक्षा देखील मिळते, पण आता जो येईल तो सैतान आहे, सादर करत आहे अर्जुन कपूर”, असं कॅप्शन दिलं आहे.
रोहित शेट्टीने फोटो अपलोड केल्यानंतर अर्जुननेदेखील ‘सिंघम अगेन’ ची पोस्ट शेअर केली आहे. यामध्ये त्याने आपले फोटो अपलोड करुन “सिंघमचा खलनायक. रोहित शेट्टीच्या कॉप युनिव्हर्सचा भाग झालो असून खूप आनंदात आहे” असे कॅप्शन त्याने दिलं आहे.
‘सिंघम अगेन’ हा ‘सिंघम’ चित्रपटाचा तिसरा भाग असून आधीच्या सर्व भागांमध्ये भरपूर ॲक्शन पाहायला मिळाली. ‘सिंघम अगेन’मध्ये तगडी स्टारकास्ट असून यामध्ये अजय देवगण, दीपिका पदुकोण, रणवीर सिंग, अक्षय कुमार, करीना कपूर व अर्जुन कपूर धमाका करताना दिसून येणार आहेत. त्यामुळे हा चित्रपट प्रेक्षकांसाठी मनोरंजनाची अतिरंजक मेजवानी ठरणार आहे.