‘चला हवा येऊ द्या’ या कार्यक्रमातून घराघरांत पोहोचलेली अभिनेत्री म्हणजे श्रेया बुगडे. या कार्यक्रमातून श्रेया घराघरांत पोहोचली. या कार्यक्रमातील तिचा अभिनय व विनोदी स्किट्स प्रेक्षकांच्या विशेष पसंतीस पडले. श्रेयाने तिच्या अभिनयाच्या जोरावर खूप मोठा चाहतावर्ग निर्माण केला आहे. सोशल मीडियावरुनही श्रेया नेहमीच काही ना काही शेअर करुन चाहत्यांच्या संपर्कात राहत असते. अशातच श्रेयाच्या सोशल मीडियावरील एका रोमँटीक पोस्टने साऱ्यांचं लक्ष वेधून घेतलं आहे. (Shreya Bugde Marriage Anniversary)
श्रेयाने तिच्या इन्स्टाग्राम अकाऊंटवरुन तिच्या लग्नाच्या नवव्या वाढदिवसानिमित्त खास पोस्ट शेअर केली आहे. या पोस्टमध्ये श्रेयाने तिच्या नवऱ्याबरोबरचे रोमँटीक फोटो शेअर केले आहेत. श्रेयाने व तिच्या पत्नीने त्यांचा लग्नाचा वाढदिवस yacht मध्ये साजरा केला. त्याचे अनेक फोटो सोशल मीडियावर चांगलेच व्हायरल होत आहेत. श्रेयाने दिलेल्या कॅप्शनवरुन हे खास सरप्राईज श्रेयाला तिच्या नवऱ्याने दिलं असल्याचं तिने म्हटलं आहे. श्रेयाच्या या पोस्टवर अनेक कलाकार मंडळींसह त्यांच्या चाहत्यांनीही लग्नाच्या वाढदिवसाच्या शुभेच्छा दिल्या आहेत.
श्रेयाच्या व्यावसायिक आयुष्याबाबत सर्वांनाच माहित आहे. मात्र अभिनेत्रीच्या खाजगी आयुष्याबाबत व लव्हलाईफबाबत फारच कमी लोकांना माहित असावं. श्रेयाने निर्माता निखिल सेठसोबत लग्नगाठ बांधत संसार थाटला आहे. या दोघांची पहिली भेट एका मालिकेच्या सेटवर झाली होती. त्यावेळी निखिलला पाहताच क्षणी श्रेया आवडली होती. परंतु श्रेयाकडून असं काही अजिबात नव्हतं. निखिल सेटवर सतत श्रेयाबरोबर मैत्री करण्याचा प्रयत्न करत होता. अशातच या दोघांमध्ये एका कारणावरुन खटकलं आणि त्यामुळे दोघांचं थोडंफार बोलणं होतं तेही बंद झालं.
पुढे काही दिवसांनी एका मालिकेच्या टायटलवर निर्माता म्हणून निखिलचं नाव पाहिल्यानंतर श्रेयाने त्याला शुभेच्छा दिल्या. त्यानंतर त्यांचं पुन्हा बोलणं सुरु झालं. याकाळात निखिलच्या घरी त्याच्या लग्नाची बोलणी सुरु होती. योग्य वेळ साधत निखिलने श्रेयाला प्रपोज केलं. श्रेयानेसुद्धा त्याला होकार दिला. पुढे २०१५ मध्ये ही जोडी विवाहबंधनात अडकली.
