‘बिग बॉस मराठी’ या लोकप्रिय कार्यक्रमातून घराघरांत पोहोचलेली अभिनेत्री म्हणजे सई लोकूर. या कार्यक्रमातून सई चांगलीच प्रसिद्धीझोतात आली. गेल्या अनेक दिवसांपासुन सईचे प्रेग्नंसी फोटोशूट चांगलेच चर्चेत होते. अशातच तिने नुकतीच सोशल मीडियावर आई झाल्याची बातमी सर्वांबरोबर शेअर केली होती. १७ डिसेंबर रोजी तिला कन्यारत्न प्राप्त झाले होते. आई झाल्याची गुडन्यूज सांगत तिने सोशल मीडियावर एक खास पोस्ट शेअर केली होती.
“आमच्या बाळाच्या येण्याची बातमी सांगताना आम्हाला खूप आनंद होत आहे. आई व बाळ दोघंही सुखरुप आहे. सगळ्यांच्या प्रेमासाठी व शुभेच्छांसाठी खूप धन्यवाद.” असं म्हणत तिने तिच्या बाळाबद्दलची एक खास पोस्ट शेअर केली होती. या पोस्टला चाहत्यांनी लाईक्स व कमेंट्स करत चांगलाच प्रतिसाद दिला होता. तसेच काही दिवसांपूर्वी तिने “आम्ही घरी येत आहोत” असं म्हणत तिच्या पती व बाळाबरोबरचा एक फोटो शेअर केला होता.
अशातच आता अभिनेत्रीने तिच्या सोशल मीडियावर आणखी एक पोस्ट शेअर केली आहे. या पोस्टद्वारे तिने तिच्या सध्याच्या भावना व्यक्त केल्या आहेत. सईने तिच्या इन्स्टाग्राम अकाऊंटवर दोन स्टोरी पोस्ट शेअर केले असून या स्टोरीद्वारे तिने तिच्या आईपणाविषयी संमिश्र भावना व्यक्त केल्या आहेत. यात तिने असे म्हटले आहे की, “खूप तक्रारी आहेत, पण तरीही काहीही तक्रार नाही, मी माझ्या छोट्या परीसाठी हे सर्व आनंदाने स्वीकारत आहे, आम्ही खूप सहनशील आहोत आणि आम्ही हे करू शकतो.”
यापुढे तिने आणखी एक पोस्ट शेअर करत असे म्हटले आहे की, “वेडेवाकडे वेळापत्रक, झोपेशिवायच्या अनेक रात्री, वेदनादायक टाके, दुर्गंधीयुक्त डायपर, कायम दुखणारी पाठ, सैल ओटीपोट, थकलेले शरीर आणि बरेच काही.” दरम्यान, या पोस्टद्वारे तिने मातृत्वाचा आनंदासह त्यासाठी सोसाव्या लागणाऱ्या अनेक गोष्टींचा उल्लेख केला आहे. त्याचबरोबर या गोष्टींचा ती आनंदाने उपभोग घेत आहे व तिचे मातृत्व एन्जॉय करत आहे.
