गेल्या वर्षी प्रदर्शित झालेला रणबीर कपूरचा ‘ब्रम्हास्त्र’ हा चित्रपट चांगलाच गाजला होता. या चित्रपटात रणबीर कपूर व आलिया भट्ट यांच्या प्रमुख भूमिका होत्या. त्याचबरोबर या चित्रपटाने बॉक्स ऑफिसवरदेखील चांगलीच कमाई केली होती. रणबीर कपूर, आलिया भट्ट, अमिताभ बच्चन, मौनी रॉय, नागार्जुन अशा अनेक कलाकारांच्या भूमिका या चित्रपटात होत्या. २०२२ मध्ये ‘ब्रम्हास्त्र’चा पहिला ‘शिव’ हा भाग प्रदर्शित झाल्यानंतर या चित्रपटाच्या दुसऱ्या भागाची प्रेक्षकांना उत्सुकता लागली होती. अशातच या दुसऱ्या भागाची सध्या चर्चा सुरू आहे.
अयान मुखर्जी दिग्दर्शित ‘ब्रह्मास्त्र’ चित्रपटाच्या दुसऱ्या भागात रणबीरच्या वडिलांची भूमिका एक तरुण अभिनेता साकारणार असल्याचे समजत आहे आणि हा अभिनेता आहे रणवीर सिंग. ‘ब्रह्मास्त्र’च्या दुसऱ्या भागात रणवीर ‘देवा’ ही भूमिका साकारणार असल्याच्या अफवा अनेकदा पसरल्या होत्या. त्याचबरोबर ही भूमिका हृतिक रोशन किंवा कन्नड अभिनेता यश साकारणार असल्याचं बोललं जात होतं. पण अधिकृतपणे कोणाच्याही नावाला दुजोरा मिळाला नसला तरी, पण आता एका मीडिया रिपोर्टनुसार, रणवीर सिंगने ‘ब्रह्मास्त्र’च्या दुसऱ्या भागात ‘देव’च्या भूमिकेसाठी होकार दिला असल्याचे समजत आहे.
आणखी वाचा – ‘अ‍ॅनिमल’ चित्रपटाचा जगभरात डंका, सुपरहिट चित्रपटांचे मोडले रेकॉर्ड, आतापर्यंत कमावले तब्बल…
काही मीडिया रिपोर्टनुसार, ‘ब्रम्हास्त्र’च्या दुसऱ्या भागात रणवीर हा वडिलांच्या भूमिकेत दिसणार आहे. रणबीर कपूरच्या वडिलांची भूमिका करण्यासाठी रणवीरची निवड करण्यात आली असून या चित्रपटासाठी त्याचे फायनल कास्टिंगही झाले आहे. २०२५ मध्ये या दुसऱ्या भागाच्या चित्रीकरणाला सुरुवात होणार असल्याच्याही चर्चा सुरू आहेत. त्यामुळे रणवीरच्या चाहत्यांसाठी ही आनंदाची बातमी आहे.
‘ब्रम्हास्त्र’ हा चित्रपट बॉक्स ऑफिसवर तूफान गाजला होता. या चित्रपटाने देशभरात २६९.४ कोटी रुपयांची कमाई केली होती तर जगभरात या चित्रपटाने ४३१ कोटी रुपयांचा गल्ला जमवला होता. दरम्यान, रणबीर सध्या त्याच्या ‘अ‍ॅनिमल’ या चित्रपटामुळे चांगलाच चर्चेत आहे. अशातच ‘ब्रम्हास्त्र – २’ च्या बातमीने त्याच्या चाहत्यांना आनंद झाला आहे. त्यामुळे त्याच्या ‘ब्रम्हास्त्र’च्या दुसऱ्या भागासाठी त्याचे चाहतेही उत्सुक आहेत.
