Vibhu Raghav Death : ‘निशा और उसके कजिन्स’ या मालिकेतून घराघरांत पोहोचलेल्या विभू राघव याचे कर्करोगाने निधन झाले. अभिनेत्याच्या निधनाच्या बातमीने सिनेसृष्टीत शोककळा पसरली आहे. अभिनेत्याला स्टेज ४ चा कोलन कर्करोग (आतड्यांचा कर्करोग) झाला होता. कर्करोगावरील उपचारादरम्यानच त्याचे निधन झाले आहे. अभिनेता मुंबईतील एका रुग्णालयात उपचार घेत होता. वयाच्या ३७ व्या वर्षी कर्करोगाने अभिनेत्याचे आयुष्य हरपले. विभूने त्याला कर्करोग झाले असल्याचे स्वतःच इंस्टाग्राम पोस्टद्वारे सांगितले होते. अभिनेत्याच्या अकाली जाण्याने चाहत्यांमध्ये आणि कलाकार मंडळींमध्ये दुःखाचं वातावरण पसरलेलं पाहायला मिळत आहे. अभिनेत्याच्या अंतिम संस्कारावेळीही अनेक कलाकार मंडळी उपस्थित होती.
विभूच्या अंतिम संस्काराला सिनेसृष्टीतील अनेक कलाकार मंडळी उपस्थित होते. यावेळी त्याचा जवळचा मित्र अभिनेता मोहित मलिकला अश्रू अनावर झाले. इतकंच नाहीतर त्याने विभूला खांदाही दिला. विभूच्या आजारपणाच्या काळात त्याला अनेक कलाकार मंडळींनी आर्थिक मदतही केली. अनेकांनी तर त्याच्या मदतीसाठी हाकही दिली. विभू या सगळ्यांचे हे उपकार कधीच विसरला नाही. त्याने प्रत्येक वेळी पोस्टमार्फ़त वा व्हिडीओमार्फत अभिनेत्याचे आभार मानले.
विभूच्या मृत्यूनंतर त्याच्या इंस्टाग्राम पोस्टवरील शेवटचा व्हिडीओ चर्चेत आला आहे. या व्हिडीओमध्ये विभू कर्करोगाशी लढतानाचा त्याचा अनुभव शेअर करत आहे. विभू व्हिडीओमध्ये असं बोलताना दिसत आहे की, “नमस्कार मित्रांनो! उपचारांबद्दल अपडेट द्यावं असं वाटलं. डिसेंबरमध्ये पीईटी स्कॅनमध्ये असं दिसून आलं की, कर्करोग यकृतापासून छाती, पाठीचा कणा आणि इतर काही भागांमध्ये पसरला आहे. केमोथेरपीच्या चार फेऱ्यांनंतरही स्कॅनमध्ये कोणतीही सुधारणा दिसून आली नाही; पण आम्ही आशा सोडली नाही. आता एक नवीन उपचार सुरु आहे. फिंगर क्रॉस केले आहे. आणि मला तुमच्या आशीर्वादांची गरज आहे”.
या व्हिडीओमध्ये विभूची तब्येत खालावली असल्याचं दिसत आहे. आजारपणाला कंटाळलेल्या विभूच्या चेहऱ्यावरचे हास्य मात्र त्याच्यातील सकारात्मकता दर्शवित आहे. आजार गंभीर असला तरी अभिनेता हा लढा अगदी जोमाने लढताना दिसला. कर्करोगाच्या उपचारामुळे तो प्रचंड बारीक झालेला दिसला शिवाय त्याचे केसही गेलेले दिसले.
