Bigg Boss Marathi 6 : ‘बिग बॉस मराठी’ सीझन 6 चा चौथा आठवडा प्रचंड वाद आणि भांडणंमुळे चर्चेत राहिला आहे. या आठवड्यात घरातील वातावरण तापलेलं पाहायला मिळालं. रुचिताचं आधी राकेश बापटसोबत जोरदार भांडण झालं आहे. त्यानंतर दिपाली सय्यदसोबतचा तिचा वादही चांगलाच चर्चेत राहिला. दुसरीकडे दिव्या शिंदेने दिलेल्या धमकीमुळे ‘बिग बॉस’ने तिला थेट घराबाहेरचा रस्ता दाखवला. एकूणच घरात सुरू असलेल्या या गोंधळामुळे प्रेक्षकांचं लक्ष संपूर्णपणे ‘भाऊचा धक्का’ या विकेंडच्या विशेष भागाकडे लागलं होतं. अखेर या भागाचा पहिला प्रोमो समोर आला आहे, त्यामध्ये होस्ट रितेश देशमुख चांगलाच संतापलेला दिसत आहे.
‘कलर्स मराठी’ने शेअर केलेल्या या प्रोमोमध्ये रितेश देशमुख थेट रुचितावर निशाणा साधताना दिसतो. रितेश म्हणतो, “रुचिता, या घरातला सगळ्यात मोठा व्हिलन तुम्ही ठरला आहात. सतत उद्धट वागणं, टास्क कसा रद्द होईल हेच पाहणं आणि दररोज लिमिट क्रॉस करणं असं एकही दिवस नाही गेला.” रितेशच्या या शब्दांमुळे घरातील सदस्यही चकित होताना दिसले. यानंतर रितेश रुचिताच्या हातात कुऱ्हाड देत “ही कुऱ्हाड घ्या” असं म्हणतो आणि इथेच प्रोमो संपतो. या सीनमुळे आजच्या एपिसोडमध्ये नेमकं काय होणार?, याबाबत प्रेक्षकांमध्ये प्रचंड उत्सुकता निर्माण झाली आहे.
दरम्यान, या प्रोमोवर नेटकऱ्यांच्या प्रतिक्रिया देखील मोठ्या प्रमाणात येत आहेत. काही जण म्हणतात, की रुचिता शांतपणे खेळली तर ती चांगली खेळाडू ठरू शकते, तर काहींनी तिला घराबाहेर काढण्याची मागणी केली आहे. रुचिताच्या सततच्या भांडणांवर नाराजी व्यक्त करणाऱ्या कमेंट्सही दिसून येत आहेत. तसेच दिव्या शिंदेच्या निष्कासनावरही चाहत्यांमध्ये प्रतिक्रिया उमटताना पाहायला मिळत आहेत. आता आजच्या ‘भाऊचा धक्का’ एपिसोडमध्ये रितेश देशमुख आणखी कोणाची शाळा घेणार?, आणि घरात पुढे कोणता नवा ट्विस्ट येणार?, हे पाहणं नक्कीच उत्सुकतेचं ठरणार आहे.
