Akshaya Hindalkar Mehendi Ceremony : ‘स्टार प्रवाह’ वाहिनीवरील ‘येडं लागलं प्रेमाचं’ फेम अभिनेता विशाल निकम सध्या एका खास कारणामुळे चर्चेत आला आहे. मागील काही दिवसांपासून विशाल निकमची ‘सौंदर्य’ नेमकी कोण आहे? असा प्रश्न त्याच्या सोशल मीडियावरील पोस्ट पाहून चाहत्यांना पडत होता. दरम्यान, विशाल निकमने सोशल मीडियावर एक नवी पोस्ट शेअर केली होती, ज्यामध्ये त्याच्यासोबत एक तरुणी दिसत आहे. मात्र, या पोस्टमध्ये त्या तरुणीचा चेहरा त्याने दाखवलेला नव्हता. यामुळे ती सुंदरी, म्हणजेच ‘सौंदर्य’ नेमकी कोण आहे? हा प्रश्न चाहत्यांमध्ये चर्चेचा विषय ठरला. दरम्यान विशालने काही दिवसांपूर्वीच सोशल मीडियावर आणखी एक पोस्ट शेअर करत अखेर त्याच्या सौंदर्याचा चेहरा दाखवला. ती अभिनेत्री दुसरी तिसरी कोण नसून अक्षया हिंदळकर आहे हे या पोस्टद्वारे स्पष्ट झालं.
दरम्यान विशालने अखेर प्रेमाची कबुली दिल्यानंतर अभिनेत्रींच्या घरी लगीनघाईला सुरुवात झाली आहे. आता विशाल आणि अक्षया यांच्या लग्नापूर्वीच्या विधींना सुरुवात झाली असून अक्षयाचा मेहेंदी सोहळा नुकताच पार पडला. तिच्या मेहेंदी सोहळ्याचे फोटोस आणि व्हिडीओ तिने सोशल मीडियावर शेअर केले आहेत. अक्षया हिंदळकर आता लवकरच लग्नबंधनात अडकणार आहे. मेहेंदी सोहळ्यासाठी अक्षयाने खास लूक केलेला पाहायला मिळाला. तिने इरकल साडीचा पारंपरिक ड्रेस घातला होता. हातावर खास सखी आणि फुलपाखराची डिझाइन मेहेंदीतून काढल्याचं दिसत आहे. हे फोटो शेअर करत तिने विशाल निकमला टॅग केलं आहे. “माझ्या मेहेंदीमध्ये तुझं नाव शोधायला तयार राहा”, असं कॅप्शन तिने या फोटोला दिलं आहे. ही पोस्ट रिशेअर करत विशालने “मी शोधलं आहे माझं नाव” असं कॅप्शन दिल आहे. (Akshaya Hindalkar Mehendi Ceremony)
अक्षया आणि विशाल गेल्या काही वर्षांपासून रिलेशनशिपमध्ये आहेत. ‘बिग बॉस मराठी’च्या घरात विशालने त्याच्या प्रेमाची कबुली दिली होती. मात्र सुंदराचं नाव त्याने गुलदस्त्यात ठेवलं होतं. काही दिवसांपूर्वीच अक्षया आणि विशालने त्यांचं नातं ऑफिशियल केलं आहे. आता लग्न करत ते संसार थाटणार आहेत. अक्षयाने तुझ्या इश्काचा नादखुळा, साता जन्माच्या गाठी, पुन्हा कर्तव्य आहे या मालिकांमध्ये काम केलं आहे. तर विशाल मराठी टेलिव्हिजनचा लोकप्रिय चेहरा आहे. ‘दख्खनचा राजा ज्योतिबा’, ‘आई मायेचं कवच’, ‘जय भवानी जय शिवाजी’ या मालिकांमध्ये तो दिसला होता. सध्या तो स्टार प्रवाहवरील ‘येड लागलं प्रेमाचं’ मालिकेत मुख्य भूमिका साकारत आहे. (Akshaya Hindalkar Mehendi Ceremony)
