इंडस्ट्रीत महिलांबरोबर घडणारे विचित्र प्रकार आणि त्याबाबत स्पष्ट बोलणं टाळलं जातं. अभिनेत्रीच पुढे येऊन घडणाऱ्या वाईट घटनांबाबत भाष्य करत नाहीत. दोन पावलं मागेच सरकतात. मात्र सुप्रसिद्ध मराठी अभिनेत्रीने धाडसी पाऊल उचलत मराठी अभिनेत्याचं घाणेरडं कृत्य सगळ्यांसमोर आणलं. अभिनेत्री प्राची पिसाटला मराठीमधील दिग्गज अभिनेते सुदेश म्हशीलकर यांनी मॅसेज केले. या मॅसेजमध्ये “तुझा नंबर दे, तुझ्याशी फ्लर्ट करायची इच्छा आहे, तू हल्ली खूप सेक्सी दिसायला लागली आहेस” असं म्हटलं. प्राचीला राग अनावर झाला तिने थेट स्क्रिनशॉट सोशल मीडियावर शेअर करत अभिनेत्याचा काळा चेहरा सगळ्यांसमोर आणला. इंडस्ट्रीतीलच अभिनेत्रीबरोबर असं अश्लील कृत्य करणारे सुदेश नक्की कोण? हे सविस्तर जाणून घेऊया. (Who is actor sudesh mhanshilkar)
सुदेश म्हशीलकर नक्की कोण?
प्राचीने सोशल मीडियावर सुदेश यांनी केलेल्या मॅसेजचे स्क्रिनशॉट शेअर केले. त्यानंतर या वादाला तोंड फुटलं. प्राचीनेही सुदेश यांना उत्तर देत खडेबोल सुनावले. तसंच कलाक्षेत्रातील इतर अभिनेत्रींनी तिला पाठिंबा दिला. आता बोलायलाच हवं म्हणत प्राचीचं अभिनेत्रींनी कौतुक केलं. सुदेश आजही कलाक्षेत्रात उत्तमोत्तम भूमिका साकारतात. ‘भाग्य दिले तू मला’ मालिकेत त्यांनी साकारलेली भूमिका विशेष गाजली.
मराठी मालिकांमध्येही काम
त्याचबरोबरीने स्टार प्रवाह वाहिनीवरील नवी मालिका ‘कोण होतीस तू काय झालीस तू’मध्ये ते श्रीकांत धर्माधिकारी ही भूमिका साकारत आहेत. याआधीही त्यांनी मराठी मालिकांमध्ये महत्त्वाच्या भूमिका साकारल्या. त्यांचं कामही प्रेक्षकांच्या विशेष पसंतीस आलं. मात्र सगळं काही सुरळीत सुरु असताना सुदेश यांना अशाप्रकारची दुर्बुद्धी का सुचली?, त्यांनी प्राचीला अश्लील मॅसेज का केले? हा प्रश्नच आहे. खरं तर प्राचीने हा प्रकार सगळ्यांसमोर आणला त्याचं विशेष कौतुक. बहुदा कोणीही यापुढे इंडस्ट्रीतील अभिनेत्रींना वागणूक देताना विचार करतील.
प्राचीने पोस्ट केल्यानंतरही अनेकांनी तिलाच ज्ञान सांगितलं. सुदेश यांचं अकाऊंट हॅक झालं आहे का? असं तिलाच सांगितलं. पण सुदेश यांनीच मॅसेज केला असल्याचं प्राचीने उघड केलं. सुदेश यांनी अनेकांना उघडपणे प्राचीला मॅसेज केला असल्याचं सांगितलं. आता सुदेश यांनी त्यांच्या इन्स्टाग्राम अकाऊंटवरील सगळ्याच पोस्ट काढल्या आहेत. तसेच प्राचीने मॅसेज केल्याचा दावा करुनही संपूर्ण प्रकारावर बोलणं टाळलं आहे. सुदेश यापुढे प्राचीला केलेल्या मॅसेजवर स्पष्टीकरण देणार का? हे पाहावं लागेल.
