Gautami patil On Vaishnavi Hagawane : आपल्या ठसकेबाज नृत्यामुळे नेहमीच चर्चेत असलेली लावणी क्वीन म्हणजे गौतमी पाटील. गौतमी पाटीलच्या नृत्याचे लाखो दिवाने चाहते आहेत. अशातच आता पुण्यातील वैष्णवी हगवणे प्रकरणात गौतमी पाटीलच नाव ओढलं जात आहे. हगवणे कुटुंबीयांच्या एका लाडक्या बैलाच्या वाढदिवसाच्या दिवशी मोठ्या कार्यक्रमाचे आयोजन करण्यात आलं होतं. या कार्यक्रमाची चर्चा राज्यभरात झाली होती. बैलाच्या बर्थडे पार्टीला गौतमी चक्क बैलासमोर नाचली असल्याचा व्हिडीओ आता व्हायरल झाला. वैष्णवी आत्महत्या प्रकरणात हा व्हिडीओ लक्षवेधी ठरतोय. मात्र, या प्रकरणाशी गौतमीचा काहीही संबंध नसल्याचं तिने माध्यमांशी बोलताना स्पष्ट केलं आहे.
बैलांसमोर नाचलेल्या कार्यक्रमाबाबत बोलताना गौतमी पाटील म्हणाली, “काही महिन्यांपूर्वी राजेंद्र हगवणेंनी एका कार्यक्रमासाठी मला बोलवलं होतं. त्यावेळी बैल जोड्यांच्या समोर मी नाचले होते. कोण आयोजक आहे, मी ते बघत नाही. मी फक्त तिथे जाऊन स्टेजवर परफॉर्म करते आणि निघून येते. माझं बाकीच्या गोष्टींशी काहीही घेणं देणं नसतं. माझी मार्केटिंग टीम याचे सर्व निर्णय घेते, मला यातलं यापूर्वी काहीही माहित नसतं”.
वैष्णवी आत्महत्या प्रकरणाबाबत बोलताना ती म्हणाली, “ही घटना फार दुर्दैवी आहे. या प्रकरणातील दोषींवर कडक कारवाई झाली पाहीजे. माझा न्यायव्यवस्थेवर विश्वास आहे. कोणत्याही गोष्टी लपवू नका. जे काही असेल ते सांगत जा. जे काही असेल ते पुढे येऊन बोललं पाहिजे. हुंडा देणे, पैसे, गाड्या देणे हे चुकीचं आहे. मुलगी दिली ती घराची लक्ष्मी असते, हुंडा देणे हे चुकीचं आहे. मी त्याचा तीव्र विरोध करते, असंही गौतमी पाटील म्हणाली.
पुढे वैष्णवी म्हणाली, “वैष्णवीच्या वडीलांची प्रतिक्रिया पाहिली. ते ऐकून फार वाईट वाटलं. अशा निर्णयाने तुमच्या आयुष्यावर फक्त परिणाम होत नाही तर तुम्ही जो निर्णय घेता, जसे वागता त्याचा परिणाम संपूर्ण कुटुंबावर होतो. त्यामुळे काहीही असो सगळं सांगा. हुंडा घेणाऱ्यांनी देखील ती एक लक्ष्मी आहे, ती आपल्या घरी आली आहे, म्हणून तिच्याकडे पाहावं”, असं तिने म्हणत भावना व्यक्त केल्या आहेत.
