Taali Trailer : अभिनेत्री सुश्मिता सेन काही काळ अभिनयक्षेत्रामधून ब्रेक घेतला. सुश्मिताचं काम पाहण्यासाठी प्रेक्षक उत्सुक झाले होते. काही महिन्यांपूर्वीच तिने तिच्या ‘ताली’ या वेबसीरिजची घोषणा केली. तिथपासूनच तृतीयपंथीयांच्या आयुष्यावर आधारित या वेबसीरिजची चर्चा सुरु झाली. ‘ताली’चं पोस्टर व टीझर प्रदर्शित झाल्यानंतर ट्रेलरकडे सगळ्यांचं लक्ष लागून राहिलं होतं. अखेर या सीरिजचा ट्रेलर प्रदर्शित झाला आहे. ‘ताली’चा ट्रेलर पाहून प्रेक्षक भारावून गेले आहेत. (Sushmita Sen Play Transgender)
‘ताली’च्या ट्रेलरमध्ये सुश्मिताचा तृतीयपंथीच्या भूमिकेतील अंदाज विशेष लक्ष वेधून घेणारा आहे. तृतीयपंथी लोकांसाठी झटणाऱ्या, त्यांच्यासाठी सतत काम करणाऱ्या सामाजिक कार्यकर्त्या गौरी सावंत यांच्यावर ही वेबसीरिज आधारित आहे. सुश्मिता या सीरिजमध्ये श्रीगौरी सावंत यांचीच भूमिका साकारत आहे. ट्रेलरमध्ये सुश्मिताच्या तोंडी असलेले संवाद विशेष चर्चेत आले आहेत.
तृतीयपंथी व्यक्तींचं चालणं, बोलणं, त्यांची देहबोली तसेच लूक यावर सुश्मिताने विशेष अभ्यास केला असल्याचं ट्रेलरमधून दिसतं. शिवाय तृतीयपंथीयांच्या हक्कासाठी लढणाऱ्या गौरी सावंत यांच्या संघर्षाची झलक या ट्रेलरमध्ये दिसत आहे. काही मिनिटांमध्येच या ट्रेलरला अधिकाधिक व्ह्युज मिळाले आहेत.
मराठी अभिनेता सुव्रत जोशीचीही ट्रेलरमध्ये झलक दिसत आहे. तृतीयपंथीयांच्या वेशामध्ये सुव्रत दिसत आहे. तर हेमांगी कवीही या सीरिजमध्ये महत्त्वाच्या भूमिकेत असेल. दिग्दर्शक रवी जाधव यांनी या सीरिजच्या दिग्दर्शनाची जबाबदारी पेलली आहे. ‘जिओ सिनेमा’ या ओटीटी प्लॅटफॉर्मवर ही सीरिज येत्या १५ ऑगस्टपासून प्रेक्षकांना पाहता येईल.
