‘झी मराठी’ वाहिनीवरील ‘तुला शिकवीन चांगलाच धडा’ ही मालिका प्रेक्षकांच्या चांगलीच पसंतीस पडत आहे. स्टारकास्ट आणि रंजक कथानकाच्या जोरावर या मालिकेने अल्पावधीतच प्रेक्षकांची पसंती मिळवली. या मालिकेतील अक्षरा-अधिपतीच्या जोडीला प्रेक्षकांनी लगेच आपलंसं करून घेतलं. ‘तुला शिकवीन चांगलाच धडा’ मालिकेत अक्षराची भूमिका अभिनेत्री शिवानी रांगोळे साकारत आहे. तर, अधिपतीच्या भूमिकेत अभिनेता ऋषिकेश शेलार झळकत आहे.
अक्षरा ही उच्चशिक्षित व एका शाळेत शिक्षिका म्हणून कार्यरत असते. यामुळे अधिपती तिला मास्तरीणबाई अशी हाक मारत असतो. अक्षराचं लग्न मनाविरुद्ध अधिपतीशी होतं. परंतु, हळुहळू अधिपती स्वत:च्या चांगुलपणाने अक्षराचं मन जिंकून घेतो. मालिकेत अधिपती हा अशिक्षित व अडाणी दाखवला आहे, मात्र प्रत्यक्षात अधिपती हा उच्चशिक्षित आहे.
‘फादर्स डे’निमित्त ‘इट्स मज्जा’ने अधिपती व चारूहास या बापलेकाबरोबर खास संवाद साधला. या संवादादरम्यान, अधिपतीने म्हणजेच अभिनेता हृषीकेश शेलारने त्याचे शिक्षण सांगितले. हृषीकेश शेलारने एम.बी.ए. पर्यंतचे शिक्षण पूर्ण केलं आहे. हृषीकेश सांगलीमध्ये लहानाचा मोठा झाला. त्याला लहानपणापासूनच अभिनयाची आवड होती. त्यामुळे त्याने लहानपणापासूनच बालनाट्यांमध्ये सहभाग घेत अभिनय केला.
हृषीकेशची आई सिव्हिल हॉस्पिटलमध्ये नर्स म्हणूण् कार्यरत आहे, तर वडील फार्मासिस्ट म्हणून काम करतात. हृषीकेशला अभ्यासात फारशी गोडी नव्हती. मात्र त्याने आई-वडिलांच्या सांगण्यावरुन त्याचे एम.बी.ए.पर्यंतचे शिक्षण पूर्ण केले. दरम्यान, मालिकेत अधिपतीने शिक्षण घेतले नसल्याचे दाखवले असले तरी खऱ्या आयुष्यात तो उच्च शिक्षित असल्याचे फार कमी जणांना माहीत आहे.
दरम्यान, अभिनयाच्या वेडापायी हृषीकेशने उच्च शिक्षण व चांगली नोकरी सोडून अभिनयाची वाट निवडली. त्याने अनेक मालिकांमधून काम करत प्रेक्षकांचे मनोरंजन केलं आहे. ‘सुंदरा मनामध्ये भरली’ मालिकेतील दौलत या भूमिकेमुळे तो प्रसिद्धीझोतात आला. त्यानंतर तो आता झी मराठी वाहिनीवरील ‘तुला शिकवीन चांगलाच धडा’ मालिकेतून प्रेक्षकांचे मनोरंजन करत आहे. या मालिकेतील त्याची अक्षराबरोबरची केमिस्ट्री सध्या चाहत्यांना विशेष आवडत आहे.
