‘झी मराठी’ वाहिनीवरील ‘तुला शिकवीन चांगलाच धडा’ या मालिकेला प्रेक्षक भरभरुन प्रतिसाद देत आहेत. मालिकेत अक्षरा-अधिपतीच्या जोडीवर प्रेक्षक भरभरुन प्रेम करताना दिसत आहेत. सध्या मालिकेत अक्षरा व भुवनेश्वरी यांच्यातील वाद कमी होताना दिसत आहे. असं असलं तरी भुवनेश्वरीच्या मनात अक्षराबद्दल राग हा असतोच. त्यामुळे भुवनेश्वरी अगदी योग्य अशी चाल खेळत अक्षराला धडा शिकवायचं ठरवतात. अशातच नुकत्याच समोर आलेल्या प्रोमोमध्ये भुवनेश्वरीने खेळलेली चाल पाहायला मिळत आहे. आणि यामुळे अक्षराचा हिरमोड झाला असल्याचंही पाहायला मिळत आहे. (Tula Shikvin Changalach Dhada Promo)
अधिपतीला गाणं गायचं असतं. मात्र गाणं गाण्याची परवानगी अधिपतीला नसते. त्यामुळे भुवनेश्वरीकडून अधिपतीला त्याची आवड जोपासता यावी म्हणून गाणं गाण्यासाठी परवानगी घ्यायला अक्षरा व चारुहास जातात. चारुहास भुवनेश्वरीला म्हणतात, “अधिपतीच्या गळ्यात गाणं आहे, सूर आहे. आणि मी ते ऐकलं आहे. त्यामुळे त्याने गाणं शिकावं अशी माझी इच्छा आहे”, असं म्हणतात. यावर भुवनेश्वरी म्हणतात, “हा माझ्या लक्षात येतंय तुमच्या दोघांचं म्हणणं काय आहे ते. आम्ही विचार करतो”, असं ती म्हणते.
त्यांनतर आता समोर आलेल्या प्रोमोमध्ये, भुवनेश्वरी अधिपतीला गाण्याची शिकवणी देण्याचं ठरवतात. आणि त्याच स्वतः शिक्षिका शोधतात. अभिनेत्री सानिया चौधरीची मालिकेत एन्ट्री झालेली पाहायला मिळत आहे. भुवनेश्वरी म्हणतात, “आजपासून तुमच्या गाण्याची शिकवणी सुरु”. यावर अक्षरा विचारते, “अधिपतींना कोण शिकवणार?”. यावर भूवनेश्वरी शिक्षिकेकडे बोट दाखवत सांगतात, “यांच्या नावातच गाणं आहे. सरगम. यांचा एकदम चांगला गळा आहे. रेडिओवर पण गातात. यांचे गाण्यांचे कार्यक्रम होतात. टीव्हीवरपण आल्या होत्या”. यावर अधिपती खुश होऊन, “एक नंबर आहेत मास्तरीणबाई”, असं म्हणतो. यावर अक्षराला धक्का बसतो. अक्षरा मास्तरीणबाई असं म्हणून त्याच्याकडे पाहते. यावर अधिपती, “अहो आता या गाणं शिकवणार म्हणजे मास्तरीणबाई या अर्थाने बोललो”, असं तो म्हणतो.
नवीन मास्तरीणबाई अधिपतीच्या आयुष्यात आल्याने अक्षराचा चेहऱ्यावरचा रंग उडालेला असतो. तर भुवनेश्वरीने अक्षराला धडा शिकवण्यासाठी ही चाल आखत नव्या मास्तरीणबाईला आणलेलं असतं, आता मालिकेत या नव्या पात्रामुळे काय ट्विस्ट येणार हे पाहणं रंजक ठरणार आहे.
