Amol Naik Become Father : ‘झी मराठी’ वाहिनीवरील सुपरहिट मालिका ‘तुझ्यात जीव रंगला’ जवळपास साडेचार वर्षे प्रेक्षकांच्या मनावर अधिराज्य गाजवत होती. राणादा आणि पाठकबाई यांच्या जोडीने प्रेक्षकांच्या मनात विशेष स्थान निर्माण केलं होत. या मालिकेतील प्रत्येक कलाकाराला प्रेक्षकांनी मनापासून प्रेम दिलं आहे. मालिकेतील हार्दिक जोशी आणि अक्षया देवधर यांनी साकारलेल्या मुख्य भूमिकांइतकंच प्रेम इतर कलाकारांनाही मिळालं. त्यातीलच एक महत्त्वाचं नाव म्हणजे अभिनेता अमोल नाईक, ज्याने मालिकेत राणादाच्या जिवलग मित्र बरकतची भूमिका साकारली होती.
राणादा आणि बरकत यांच्यातील मैत्री मालिकेतील खास आकर्षण ठरलं होतं. बरकतच्या साध्या, मनमिळाऊ स्वभावाने आणि हास्यास्पद संवादांनी त्याने प्रेक्षकांच्या मनात वेगळी जागा निर्माण केली. अभिनयाच्या जोरावर घराघरांत पोहोचलेल्या अमोल नाईकबद्दल एक आनंदाची बातमी आता समोर आली आहे, आणि ती चाहत्यांमध्ये जलद गतीने व्हायरल होत आहे.
आणखी वाचा : शुभमंगल सावधान! तेजस्विनी झाली सरवणकरांची सून; लग्नातील पहिला फोटो समोर
अभिनेता अमोल नाईकच्या घरी चिमुकलीचं आगमन झालं आहे. म्हणजेच अभिनेता अमोल नाईक पिता झाला आहे. ४ डिसेंबर २०२५ रोजी, म्हणजेच दत्त जयंतीच्या शुभदिनी त्याच्या घरी चिमुकलीच्या आगमनाने आनंदाचं वातावरण निर्माण झालं. हा आनंदाचा क्षण अमोलने स्वतः सोशल मीडियावर शेअर करत चाहत्यांना ही सरप्राईज दिलं. पोस्ट शेअर करताना त्यांनी कॅप्शनमध्ये लिहिले “मुलगी झाली हो… श्री स्वामी समर्थ”, आणि काही क्षणांतच या पोस्टवर शुभेच्छांचा वर्षाव सुरू झाला.
अमोल नाईकच्या या पोस्टवर त्याचा चाहत्यांनी, मित्रांनी आणि सहकलाकारांनी लाईक्स, कमेंट्स आणि शुभेच्छांचा वर्षाव केला आहे. अनेकांनी “बरकत बाबा झाला” अशी मजेशीर कमेंटही केली आहे. अमोल नाईकच्या आयुष्यातील हा सुंदर टप्पा चाहत्यांनी मनापासून साजरा केला आहे.
