Shubhangi Kedar Wedding : मराठी मनोरंजनसृष्टीमध्ये सध्या लग्नसोहळ्यांची लगबग सुरु असल्याची पाहायला मिळत आहे. अनेक कलाकारांनी लग्नगाठ बांधत आयुष्याची नवी सुरुवात केली आहे. नुकतंच अभिनेता विशाल निकम आणि अभिनेत्री अक्षया हिंदळकर यांचा विवाहसोहळा पार पडला आहे. आता या यादीत लोकप्रिय गायिका शुभांगी केदार हिचीही भर पडली आहे. शुभांगीने तिच्या जोडीदारासोबत पारंपरिक पद्धतीने विवाह करत नव्या प्रवासाची सुरुवात केली आहे. तिच्या लग्नाचे फोटो आणि व्हिडीओ सोशल मीडियावर समोर येताच चाहत्यांकडून शुभेच्छांचा वर्षाव होत आहे.
शुभांगीच्या पतीचे नाव प्रणित वानवे आहे, तोही कलाक्षेत्राशी निगडित आहे. गेल्या काही वर्षांपासून दोघे रिलेशनशिपमध्ये होते. प्रणितने शुभांगीच्या अनेक अल्बम साँग्समध्ये तिला साथ दिली आहे. त्यांच्या नात्याची झलक चाहत्यांना आधीपासूनच सोशल मीडियावरून पाहायला मिळत होती. अखेर ते लग्नाच्या बंधनात अडकले आहेत. लग्नसमारंभ पूर्णपणे पारंपरिक पद्धतीने पार पडला. शुभांगीने या खास दिवशी नऊवारी साडी परिधान करत पारंपरिक दागिन्यांनी आपला लूक खुलवला. तिचा साधा आणि देखणा अंदाज साऱ्यांचे लक्ष वेधून घेत होता. तर प्रणितने धोतर आणि पारंपरिक पेहरावात उपस्थिती लावली. दोघांची जोडी अत्यंत आकर्षक दिसत होती. (Shubhangi Kedar Wedding)
रिसेप्शनसाठीही दोघांनी वेगळा आणि खास लूक केला. हिरव्या रंगाच्या साडीमध्ये शुभांगीचे सौंदर्य अधिकच खुलून दिसत होते. समोर आलेल्या एका व्हिडीओमध्ये तिच्या लग्नातील विविध लूकची झलक पाहायला मिळते, ज्यामुळे चाहत्यांमध्ये उत्सुकता वाढली आहे. शुभांगी केदार ही मराठी संगीतविश्वातील लोकप्रिय आवाज मानली जाते. ‘गोव्याच्या किनाऱ्यावर’ या गाण्यामुळे तिला विशेष प्रसिद्धी मिळाली. तसेच ‘ऐरणीच्या देवा तुला’ हे गाणेदेखील प्रेक्षकांच्या पसंतीस उतरले आहे. आता वैयक्तिक आयुष्यातील या नव्या अध्यायामुळे शुभांगी आणखी आनंदी आणि उत्साही दिसत आहे. चाहत्यांनीही तिच्या वैवाहिक आयुष्यासाठी भरभरून शुभेच्छा दिल्या आहेत. (Shubhangi Kedar Wedding)
आणखी वाचा – लग्नाच्या दिड वर्षानंतर प्रसिद्ध अभिनेत्री होणार आई, खास पोस्ट शेअर करत दिली आनंदाची बातमी, म्हणाली…
