Roshan Bhajankar Love Story : ‘बिग बॉस मराठी’चा सहावा सीझन सध्या चांगलाच चर्चेत आला आहे. घरात प्रवेश केल्यापासून अवघ्या काही दिवसांतच स्पर्धकांमधील मतभेद, वाद आणि टास्कमधील चढाओढ यामुळे शो चर्चेचा विषय ठरत आहे. कधी तन्वी कोलते आणि दीपाली सय्यद यांच्यातील वाद, तर कधी तन्वी कोलते आणि सागर कारंडे यांच्यातील खटकेबाजी; यासोबतच विशाल कोटीयन आणि राकेश बापट यांच्यातील मतभेदांनीही घरात तणावाचं वातावरण निर्माण झालं आहे. कॅप्टन्सी पदासाठी सुरू असलेली चुरस आणि प्रत्येक स्पर्धकाचा वैयक्तिक प्रवास प्रेक्षकांचे लक्ष वेधून घेत आहे.
अशातच ‘बिग बॉस मराठी’चा एक नवा प्रोमो समोर आला आहे, या प्रोमोमध्ये रोशन भजनकरने आपल्या प्रेमकथेचा खुलासा केला आहे. सोशल मीडियावरून लोकप्रिय झालेला रोशन, घरात आपली गोष्ट सांगताना भावुक झालेला दिसतो. प्रोमोमध्ये किचन एरियात रोशन तन्वी कोलतेशी संवाद साधताना आपलं लव्ह मॅरेज झाल्याचं सांगतो. तो म्हणतो, “त्या वेळी खूप लोक पळून जात होते. आपणही पळून जाऊया, असं माझी पत्नी म्हणत होती. पण मी तिला नाही म्हणालो. मी तिच्या घरी गेलो. तिच्या घरच्यांनी मला टोमणे मारले. लग्नासाठी नकार दिला. ‘तू हमाली करतोस,’ असं ते म्हणाले. तेव्हा मी माझ्या बायकोला सांगितलं की तू ठाम राहा. हे जे बोलणारे आहेत, त्यांची बोलती मी बंद करतो.” अशा शब्दांत त्याने आपली प्रेमकथा सांगितली आहे.
रोशन भजनकर दोन मुलींचा पिता आहे. ‘बिग बॉस मराठी’च्या घरात त्याची एन्ट्री होताच, टीव्हीवर त्याला पाहून त्याच्या पत्नीच्या डोळ्यांत अश्रू आले होते. घरची आर्थिक परिस्थिती साधी असतानाही, गेली अनेक वर्षे तो सिमेंटची पोती उचलण्याचं काम करत आहे. ‘अमरावतीचा बॉडीबिल्डर’ अशी त्याची वेगळी ओळख असून, कठोर परिश्रम, शिस्त आणि सातत्याच्या जोरावर त्याने हा प्रवास यशस्वीपणे घडवून आणला आहे.संघर्ष, प्रेम आणि आत्मविश्वास यांची सांगड घालणारी रोशन भजनकरची ही कथा सध्या प्रेक्षकांच्या मनाला भिडत आहे. तुम्हाला रोशनची ही प्रेमकहाणी कशी वाटली? तुमचं मत कॉमेंट्समध्ये नक्की कळवा.
