२०१२ साली झालेल्या शीना बोरा हत्या प्रकरणाची बरीच चर्चा झाली होती. या हत्याकांडात एका मीडिया हाऊसच्या कार्यकारी इंद्राणी मुखर्जीवर तिच्याच मुलीची हत्या केल्याचा आरोप होता. आता यावर एक डॉक्युमेंट्री सीरिज बनवण्यात आली आहे. नुकताच या सीरिजचा ट्रेलर प्रदर्शित करण्यात आला आहे. शिवाय, या सीरिजच्या प्रदर्शनाची तारीखही समोर आली आहे.
२०१२ साली झालेले शीना बोरा हत्या प्रकरण हे बरेच गाजले होते. शीना बोरा हत्या प्रकरणात इंद्राणी मुखर्जी व तिचा पती पीटर मुखर्जी यांची नावे चर्चेत आली होती. यावर एक डॉक्युमेंट्री सीरिज बनवण्यात आली असून या सीरिजचे नाव ‘द इंद्राणी मुखर्जी स्टोरी: बरीड ट्रुथ’ असं आहे. ‘द इंद्राणी मुखर्जी स्टोरी: बरीड ट्रुथ’ या सीरिजद्वारे कथेच्या दोन्ही बाजूंची अनेक रहस्ये उलगडणार असल्याचे म्हटले जात आहे.
नेटफ्लिक्स इंडियाने आपल्या सोशल मीडियाद्वारे या सीरिजचे ट्रेलर प्रदर्शित केले असून् या पोस्टच्या कॅप्शनमध्ये “एकेकाळी देशाला हादरवून सोडणाऱ्या खुनांचा शोध घेणारी ‘इंद्राणी मुखर्जी स्टोरी: बरीड ट्रुथ’ ही सीरिज येत्या २३ फेब्रुवारीला नेटफ्लिक्सवर प्रदर्शित होत आहे.” असं म्हटलं आहे. ही सीरिज इंग्रजी, हिंदी, तमिळ व तेलुगू अशा चार भाषांत प्रदर्शित होणार आहे.
या सीरिजमधून इंद्राणीची अटक आणि तुरुंगात तिच्यावर झालेली वागणूक यासह अनेक गुपिते उघड होणार आहेत. सोशल मीडियावर या सीरिजचा ट्रेलर प्रदर्शित होताच नेटकऱ्यांकडून या ट्रेलरला चांगलाच प्रतिसाद मिळत आहे. त्यामुळे अनेकजण या सीरिजची आतुरतेने वाट पाहत आहेत. दरम्यान, या सिरिजमध्ये स्वत: इंद्राणी मुखर्जी यांच्यासह त्यांचे कुटुंबीय, वकील आणि या प्रकरणाचा पर्दाफाश करणाऱ्या अनेक अनुभवी पत्रकारांच्या मुलाखतींचा समावेश असणार आहे.