Tharlala Tar Mag : ‘स्टार प्रवाह’ वाहिनीवरील ‘ठरलं तर मग’ ही मालिका नेहमीच टीआरपीच्या शर्यतीत अव्वल स्थानावर असलेली पाहायला मिळाली आहे. या मालिकेने, मालिकेच्या कथानकाने, मालिकेतील कलाकारांनी प्रेक्षकांच्या मनात घर केलं. मालिकेत पुढे काय होणार?, कोणते ट्विस्ट मालिकेत पाहायला मिळणार याकडे साऱ्यांच्या नजरा लागून राहिलेल्या असतात. अशातच मालिकेतील सायली म्हणजे जुई गडकरी सर्वांची लाडकी आहे. सायली-अर्जुनच्या जोडीला नेहमीच प्रेक्षक प्रेम देतात. सध्या मालिकेत अर्जुन सायलीच्या खऱ्या आई-बाबांचा शोध घेत आहे. त्यामुळे सायलीचे खरे आई-बाबा प्रतिमा व रविराज असल्याचं केव्हा समोर येणार याकडे साऱ्यांच्या नजरा लागून राहिल्या आहेत.
सोशल मीडियावर तर ‘ठरलं तर मग’ मालिकेचे असंख्य फॅनपेज आहेत. इतकंच नव्हेतर मालिकेचे आणि मालिकेतील कलाकारांचेही खूप चाहते आहेत. ही मालिका स्टार प्रवाह वाहिनीवर रात्री ८.३० वाजता प्रसारित केली जाते, त्यापूर्वीच म्हणजेच मालिकेचे भाग टेलिव्हिजनवर प्रसारित होण्यापूर्वीच मालिकेचे भाग या फॅनपेजद्वारे प्रेक्षकांना दाखविले जातात. टीव्हीवर भाग पाहण्याआधीच प्रेक्षकही सोशल मीडियावर हे भाग पाहून मोकळे होतात. अर्थात ही बाब चूक आहे आणि ही बाब जुईच्या लक्षात येताच तिने यावर आक्षेप उठविला आहे.
फॅनपेज करत असलेली चूक जुईच्या लक्षात येताच तिने इंस्टाग्राम स्टोरीद्वारे पोस्ट शेअर करत ‘कृपया असे करू नका’ असं म्हणत या फॅनपेजेसना आवाहन केलं आहे. अभिनेत्रीने शेअर केलेल्या पोस्टमध्ये ठरलं तर मग मालिकेचे झलक आणि संपूर्ण मालिका पाहण्यासाठी लिंक जॉईन करा असं म्हटलं आहे. ही पोस्ट शेअर करत सायली म्हणते, “कृपया ही विनंती समजा किंवा चेतावणी समजा. पण, अशाप्रकारे मालिकेचे एपिसोड टेलिव्हिजनवर टेलिकास्ट होण्याआधी शेअर करु नका. कृपया असं करु नका. आपण काही नियमांचं पालन करुयात”, अशी विनंती केली आहे.
आणखी वाचा – “काहीच काम करत नाही”, हिना खानच्या सासूची तक्रार, टेलिव्हिजन शोदरम्यान बोलली, म्हणाली, “हिच्याशी पंगा…”
‘ठरलं तर मग’ मालिकेचा चाहतावर्ग मोठ्या प्रमाणात आहे. पण, मालिका सगळ्यांनी टेलिव्हिजनवर रात्री ८:३० वाजता पाहावी असं जुईने तिच्या पोस्टमध्ये नमूद केलं आहे. याशिवाय प्रेक्षक ही मालिका जिओहॉटस्टारवर सुद्धा पाहू शकतात.
