दिग्दर्शक केदार शिंदे दिग्दर्शित काही दिवसांपूर्वीच प्रदर्शित झालेला ‘बाईपण भारी देवा’ या चित्रपटाची चर्चा केवळ महाराष्ट्रात नाही, तर देश-विदेशातही झालेली पाहायला मिळाली. बॉक्स ऑफिसवरही या चित्रपटाने बक्कळ कमाई केली. सोशल मीडियावर तर अजूनही चित्रपटातील गाणी, डायलॉग्सचे अनेक रील्स व्हायरल होताना दिसत आहेत. चित्रपटातील कलाकारांचं सर्व स्तरातून कौतुक केलं जात आहे. या चित्रपटामुळे अभिनेत्री शिल्पा नवलकर विशेष चर्चेत आली. सोशल मीडियावरही शिल्पा यांचा बराच वावर असलेला पाहायला मिळतो. (Shilpa Navalkar Share Bts Video)
अशातच बाईपण भारी चित्रपटानंतर त्या छोट्या पडद्यावर दिसल्या. स्टार प्रवाह वाहिनीवरील ठरलं तर मग ही मालिका सध्या टीआरपीच्या शर्यतीत अव्वल स्थानावर आहे. ही मालिका सध्या प्रेक्षकांची आवडत्या मालिकांच्या यादीत आहे. अशातच या मालिकेत आपल्याला अभिनेत्री शिल्पा नवलकरची एंट्री पाहायला मिळाली. शिल्पा नवलकर यांनी या मालिकेत प्रतिमा ही भूमिका साकारली आहे.
शिल्पा यांनी या भूमिकेसाठीचा खास मेकअपचा पडद्यामागचा व्हिडीओ सोशल मीडियावर शेअर केला आहे. प्रतिमाचा अपघात झालेला आणि भाजलेला लूक दाखवण्यासाठी अभिनेत्रीला खास प्रोस्थेटिक मेकअप करण्यात आला होता. दरम्यान मेकअप करतानाचा एक व्हिडीओ पोस्ट करत व्हिडीओच्या कॅप्शनमध्ये शिल्पा नवलकर लिहितात, “काही क्षणांसाठी दिसणाऱ्या भाजल्याच्या खुणा दाखवण्यास मागे असणारी मेहनत!! ‘ठरलं तर मग’ मालिका स्टार प्रवाहवर पाहात राहा.”
शिल्पा नवलकर यांनी शेअर केलेला हा BTS व्हिडीओ पाहून नेटकऱ्यांनी प्रतिक्रिया दिल्या आहेत. अभिनेत्री सुकन्या मोने यांनी कमेंट करत म्हटलं आहे की, “बापरे! तुला खरंच सलाम आहे”. तर एका युजरने, “खूप मेहनत आणि जोखमीचं काम आहे तुम्हाला अनेक शुभेच्छा” असं कमेंटमध्ये म्हटलं आहे. तर आणखी एका चाहत्याने “उत्तम कलाकर कसा असावा तुमच्या कडून शिकावे मॅडम, कलाकृती उत्तम कशी करता येईल त्यासाठी वेगवेगळे प्रयत्न आणि त्याच बरोबर मेकअप आर्टिस्ट चे पण कौतुक की इतकी मेहनत घेऊन कलाकारचे व्यक्तिरेखे अनुरुप रुप पालटता” अशी कमेंट करत शिल्पाच कौतुक केलं आहे.
आणखी वाचा – ‘सुंदरा मनामध्ये भरली’ फेम अक्षया नाईकची रंगभूमीवर दमदार एन्ट्री, नव्या लूकने वेधलं लक्ष
दरम्यान, ‘ठरलं तर मग’मध्ये सध्या किल्लेदार प्रतिमाचा शोध घेत आहेत. त्यांच्यासमोर प्रतिमा येणार का? सायली आणि प्रतिमाची भेट होणार का? हे आगामी एपिसोड्समध्ये प्रेक्षकांना पाहायला मिळेल.
