विनोदी अभिनय क्षेत्रातील एक लोकप्रिय नाव म्हणजे सुनिल पाल. सुनिल पाल यांनी आजवर त्यांच्या अनेक विनोदी प्रहसनांमधून प्रेक्षकांचे मनोरंजन केले आहे. त्यांच्या विनोदी सादरीकरणाचे देशभरात अनेक चाहते आहेत. सुनिल पाल त्यांच्या विनोदी अभिनयासह सोशल मीडियावर चांगलेच सक्रिय असतात. अशातच त्यांनी सोशल मीडियावर एक व्हिडीओ पोस्ट करत ‘कपिल शर्मा शो’वर टीका केली आहे.
छोट्या पडद्यावर ‘द कपिल शर्मा शो’ने आतापर्यंत प्रेक्षकांचे चांगलेच मनोरंजन केले आहे. अशातच आता कपिल शर्माचा हा कॉमेडी शो ओटीटी प्लॅटफॉर्मवर प्रदर्शित होणार आहे. या शोद्वारे सुनिल ग्रोव्हर व कपिल शर्मा मोठ्या कालावधीनंतर एकत्र काम करणार आहेत. नुकताच या शोचा प्रोमो शेअर करण्यात आला असून सुनिल पाल यांनी या प्रोमोवर नाराजी व्यक्त केली आहे. हा प्रोमो अतिशय वाईट असून कपिल शर्माने कॉमेडीला वाचवावं असं सुनिल पाल यांनी म्हटलं आहे.
याच संबंधित एक व्हिडीओ पोस्ट करत सुनिल पाल यांनी असं म्हटलं आहे की, “कपिल शर्माने शेअर केलेले नेटफ्लिक्स शोचे प्रोमोज पाहून मी खूप निराश झालो आहे. कपिल शर्मा हा कॉमेडीचा सुपरस्टार आहे. तो कॉमेडीचा बादशाह आहे. प्रत्येक घराघरात त्याचा शो कौटुंबिक मनोरंजनासाठी बघितला जातो. पण आता त्याचा नवा शो ओटीटीवर येत आहे. त्याचा प्रोमो गलिच्छ असून त्यात अनेक वाईट शब्दांचा वापर होत आहे. मला वाटतं इथे कॉमेडीचा बादशाह पराभूत होईल आणि मी माझा बादशाह पराभूत होताना पाहू शकत नाही”.
आणखी वाचा – सुप्रसिद्ध अभिनेत्री तेजस्विनी पंडितची मोठी घोषणा, आता हिंदी निर्मात्यांसह करणार मराठी चित्रपटाची निर्मिती
यापुढे त्यांनी आपली नाराजी व्यक्त करत असं म्हटलं आहे की, “तुझ्या वागण्या-बोलण्याप्रमाणेच तुझा विनोदही अगदीच निर्मळ आहे. कपिल मी तुझा खूप मोठा चाहता आहे. जे सुरू आहे ते तुम्हाला थांबवावे लागेल, तुम्ही खरे कॉमेडियन आहात. त्यामुळे मी हात जोडून विनंती करतो, असे करू नका. तुमचे चाहते कुटुंबातील सदस्य आहेत, त्यांच्यासाठी चांगली कॉमेडी करा. मला बाकी लोकांकडून काहीच अपेक्षा नाही. तुमच्या आजूबाजूला उभ्या असलेल्या लोकांची तुमच्याबरोबर उभं राहण्याची लायकीही नाही. ते तुमच्या बरोबरीचे नाहीत. त्यामुळे तुम्ही याकडे जातीने लक्ष द्या आणि तुम्ही आजवर जशी कॉमेडी करत आलात तशीच यापुढेही करा”.
दरम्यान, नेटफ्लिक्स या ओटीटी प्लॅटफॉर्मवर ‘द ग्रेट इंडियन कपिल शो’ येत्या ३० मार्चपासून प्रसारीत होणार आहे. या शोमध्ये कपिलबरोबर सुनील ग्रोव्हर, अर्चना पुरण सिंह, कृष्णा अभिषेक, कीकू शारदा, राजीव ठाकूर आदी कलाकारही दिसणार आहे.
