मराठी चित्रपटसृष्टी सातासमुद्रापलिकडे पोचवण्यामागे अनेक दिग्गज कलाकार मंडळींचं मोठं योगदान आहे. त्यातीलच एक कलाकार म्हणजे ज्येष्ठ अभिनेते अशोक सराफ. अशोक सराफ यांचं काम आणि त्यांच्या अभिनयाचे लाखो चाहते आहेत. त्यांचे चित्रपट आजही प्रेक्षक आवडीने पाहतात. नुकतंच त्यांना शिवशाहीर बाबासाहेब पुरंदरे पुरस्काराने सन्मानित करण्यात आलं. या कार्यक्रमाला सांस्कृतिक मंत्री सुधीर मुनगंटीवारही उपस्थित होते. यावेळी सुधीर मुनगंटीवार यांनी मोठी घोषणा केली.
अशोक सराफ यांच्या नावाची पद्मश्री पुरस्कारासाठी शिफारस करणार असल्याचं यावेळी सुधीर मुनगंटीवार यांनी सांगितलं. दरम्यान सांस्कृतिक मंत्र्यांच्या घोषणेनंतर अशोक सराफ यांनी प्रेक्षकांचे आभार मानले. सुधीर मुनगंटीवार म्हणाले, “कधी अशोक सराफ यांनी विनोदाचा बादशाह म्हटलं जातं, कधी विनोदवीर म्हटलं जातं, विनोदी देशाचा प्रधानमंत्रीही म्हटलं जातं. पण हे सगळं खरं आहे. रडवण्याचा अभिनय करणं हे तसं कठीण. पण हसवण्याचा अभिनय करुन समोरच्यांना हसवणं हे तसं महाकठीण. हे महाकठीण काम अशोक सराफ यांनी अनेक वर्ष अभिनय करत केलं. त्याबद्दल त्यांचं मनापासून अभिनंदन”.
पुढे ते म्हणाले, “पद्म पुरस्कारासाठी महाराष्ट्र शासनाच्या वतीने नावं सुचवायची असतात, त्याचा मी अध्यक्ष आहे. मी खरंतर मनात विचार करत होतो कोणती कोणती आणि कशी नावं सुचवायची?. पण इथं आल्यावर माझा निर्णय पक्का झाला की महाराष्ट्र सरकारच्या वतीने पद्म पुरस्कारासाठी अशोक सराफ यांचं नाव निश्चितपणे पाठवलं पाहिजे आणि ते आम्ही पाठवणार”.
सुधीर मुनगंटीवार यांनी घोषणा केल्यानंतर अशोक सराफ यांनी हात जोडले. तसेच त्यांच्या चेहऱ्यावरचा आनंद पाहण्यासारखा होता. या कार्यक्रमादरम्यान अशोक यांनी त्यांच्या मनातील भावनाही व्यक्त केल्या. “आजचा सत्कार मी कधीही विसरु शकत नाही. कलेच्या क्षेत्रात विविधता आणण्याचा प्रयत्न करत असताना कलाकाराला प्रेक्षकांकडून मिळणारे पाठबळ फार महत्वाचे असतात. त्याशिवाय कलाकाराचे प्रयत्न व्यर्थ आहेत. मला कायमच असे पाठबळ महाराष्ट्रातील प्रेक्षकांनी दिलं”. असं म्हणत अशोक सराफ यांनी आनंद व्यक्त केला.