Nagarjuna Sister Passes Away: साऊथ सुपरस्टार अक्किनेनी नागार्जुन यांच्या घरात दुःखाचं वातावरण पसरलं आहे. दिवंगत ज्येष्ठ अभिनेते अक्किनेनी नागेश्वर राव यांची मुलगी आणि सुपरस्टार नागार्जुन यांची मोठी बहीण नागा सरोजा यांचे निधन झाले आहे. बऱ्याच दिवसांपासून त्या आजाराने त्रस्त असल्याचे सांगण्यात आलं. मंगळवारी त्यांनी अखेरचा श्वास घेतला.
नागार्जुन यांची बहीण नागा सरोजा यांना श्वास घेण्याचा त्रास होत होता. मंगळवार दिनांक १७ ऑक्टोबर रोजी त्यांनी या जगाचा निरोप घेतला. त्यामुळे अक्किनेनी यांच्या घरावर शोककळा पसरली आहे. बहिणीच्या मृत्यूनंतर नागार्जुन यांचे संपूर्ण कुटुंब शोकसागरात बुडाले आहे. नागा सरोजा या अभिनेता नागार्जुन यांची तिसरी मोठी बहीण होती. अक्किनेनी नागेश्वर राव यांना पाच मुले होती आणि नागा सरोजा ही त्यांची तिसरी मुलगी होती. अक्किनेनी नागेश्वर राव यांना तीन मुली आणि दोन मुलं असून सत्यवती, नागा सुशीला, नागा सरोजा, वेंकट आणि नागार्जुन अशी त्यांची नावं आहेत.
मंगळवारी सकाळी नागा सरोजा यांचा मृत्यू झाला असल्याची बातमी उशिरा उघडकीस आली. बहिणीच्या मृत्यूची बातमी कळताच चित्रपट व राजकीय क्षेत्रातील व्यक्ती नागार्जुनला भेटायला येत आहेत. तसेच अनेकांनी सोशल मीडियाच्या माध्यमातून नागा सरोजा यांना श्रद्धांजली अर्पण केली आहे. बुधवारी नागा सरोजा यांच्या पार्थिवावर अंत्यसंस्कार करण्यात आले.
नागार्जुन यांच्या तीन पिढ्या चित्रपटसृष्टीत सक्रिय आहेत. तेलगू चित्रपटसृष्टीत अक्किनेनी कुटुंबाचे वेगळे स्थान आहे. नागेश्वर राव यांच्या अभिनयाचा वारसा त्यांचा धाकटा मुलगा नागार्जुन याने पुढे चालू ठेवला आहे. कुटुंबातील बहुतांश सदस्य चित्रपटसृष्टीत असले तरी नागा सरोजा सुरुवातीपासूनच सिने विश्वापासून दूर राहिल्या. चित्रपटसृष्टी संदर्भातील कोणत्याच कार्यक्रमांना त्यांनी उपस्थिती लावली नाही. त्या फक्त कौटुंबिक कार्यक्रमांना हजेरी लावायच्या.
