‘बिग बॉस’ फेम व गायक राहुल वैद्य नेहमीच कोणत्या ना कोणत्या कारणामुळे चर्चेत असतो. सोशल मीडियावरही राहुल बऱ्यापैकी सक्रिय असतो. सध्या राहुल त्याची पत्नी दिशा परमार आणि मुलगी नव्या यांच्याबरोबर दुबईमध्ये व्हॅकेशन एन्जॉय करत असल्याचं समोर आलं आहे. दुबई येथे फिरतानाचे अनेक फोटो व व्हिडीओ राहुलने सोशल मीडियाद्वारे त्याच्या चाहत्यांसह शेअर केले आहेत. दरम्यान, दुबईत काहीसा पाऊस झाल्याने तेथील परिस्थिती अत्यंत बिकट झाल्याची माहिती राहुलने दुबई येथून दिली आहे. (Rahul Vaidya At Dubai)
राहुल वैद्य त्याच्या इन्स्टाग्राम स्टोरीवर सतत फोटो व व्हिडीओ शेअर करत असतो. राहुलने एक व्हिडीओ शेअर केला आहे, ज्यामध्ये तो दुबईच्या रस्त्यावर भरलेल्या पाण्यातून रस्ता ओलांडताना दिसत आहे. या व्हिडीओमध्ये राहुलने चपला हातात धरलेल्या दिसत आहेत. आणि त्याची पँटवर करुन तो पाण्यातून वाट काढताना दिसत आहे. या व्हिडीओमध्ये रस्त्यावर सर्वत्र पाणीच पाणी दिसत आहे. वाहनेही पाण्यात उभी असलेली दिसत आहेत. राहुलकडे बघून त्याने पाण्याने भरलेला रस्ता मोठ्या कष्टाने पार केल्याचं दिसत आहे.
दुबईमध्ये अवघ्या ३-४ तासांच्या पावसामुळे ही परिस्थिती झाल्याचे राहुलने सोशल मीडियाद्वारे सांगितलं. या स्टोरीमध्ये तो कारमध्ये बसलेला दिसत आहे. गाडीत बसून राहुल बाहेरचे दृश्य दाखवत आहे. अवघ्या ३-४ तासांच्या पावसाने दुबईची अशी वाईट अवस्था झाल्याचे त्यांचे म्हणणे आहे. व्हिडीओमध्ये राहुल सांगतो की, “दुबईच्या लोकांना अशा पावसाची सवय नाही. २००८मध्ये असा पाऊस पडला होता आणि आता इतक्या वर्षांनी एवढा पाऊस पडला आहे असे मला कोणीतरी सांगितले. सर्व वाहनेही पाण्यात बुडाली आहेत”.
राहुल वैद्यने टीव्ही अभिनेत्री दिशा परमारसह लग्नगाठ बांधली. लग्नाच्या २ वर्षांनंतर या जोडप्याने त्यांनी गोंडस अशा मुलीला जन्म दिला. नव्या असं त्यांच्या मुलीचं नाव आहे. काही दिवसांपूर्वीच या जोडप्याने त्यांच्या मुलीचा चेहरा चाहत्यांना दाखवला. सोशल मीडियावर ते लेकीबरोबरचे अनेक व्हिडीओ व फोटो पोस्ट करत असतात. राहुल व दिशा पहिल्यांदाच त्यांच्या लेकीसह परदेशात फिरायला गेले आहेत.
