पाकिस्तानचा क्रिकेट स्टार शोएब मलिकने प्रसिद्ध पाकिस्तानी अभिनेत्री सना जावेदबरोबर लग्न केले आहे. सोशल मीडियावर त्याच्या लग्नाचे फोटो व्हायरल होताच अनेकांच्या भुवया उंचावल्या. शोएबने स्वत: सोशल मीडियावर त्याच्या लग्नाचे म्हणजेच निकाहचे काही फोटो सोशल मीडियावर शेअर केले आहेत. गेल्या काही दिवसांपासून सानिया मिर्झा व तिचा पती शोएब मलिक यांच्यात घटस्फोट झाल्याच्या अनेक अफवा पसरल्या होत्या. अशातच आता शोएब मलिकच्या तिसऱ्या लग्नाच्या अफवांना पूर्णविराम मिळाला आहे.
शोएब व सना यांच्या लग्नावर सानियाचे वडील इम्रान मिर्झा यांनी पीटीआय या वृत्तसंस्थेला सानियाने शोएबला खुला घटस्फोट दिला असल्याचे म्हटले. मुस्लिम महिलांच्या अधिकारांनुसार खुला म्हणजे मुस्लिम महिला तिच्या पतीला स्वतःच घटस्फोट देते. अशातच आता शोएबच्या बहिणीने त्याच्या लग्नाविषयी एक खुलासा केला आहे. ‘द पाकिस्तान डेली’च्या वृत्ताप्रमाणे, सानियाने शोएबबरोबर घटस्फोट घेतल्याचे सांगितले आहे.
हेही वाचा – बॉलिवूड अभिनेत्री कंगणा रनौत रामजन्मभूमीत दाखल, अयोध्येत पोहोचताच पार पाडले होमहवन व पूजा, नंतर झाडूही मारला
सानिया शोएबच्या विवाहबाह्य संबंधांना कंटाळली होती. त्यामुळे तिने त्याला घटस्फोट दिला असल्याचा खुलासा स्वत: शोएबच्या बहिणीने केला आहे. दरम्यान, शोएब व सनाच्या लग्नात शोएबच्या कुटुंबातील एकाही सदस्याने सहभाग घेतला नसल्याचे पाहायला मिळाले होते. अशातच आता बहिणीने शोएब व सानियाच्या नात्याबद्दल केलेल्या खुलासामुळे सर्वांनाच धक्का बसला आहे.
दरम्यान, सानिया मिर्झा व शोएब मलिक हे गेल्या काही महिन्यांपासून एकत्र दिसत नव्हते. त्यामुळे त्यांच्या नात्याबद्दल अनेकदा अफवा पसरल्या होत्या. शोएब व सानियाला पाच वर्षांचा मुलगाही आहे जो सानियाबरोबर राहतो. तर शोएबने लग्न केलेली २८ वर्षीय सना जावेद ही पाकिस्तानच्या अनेक टीव्ही शोमध्ये दिसली आहे, तिच्या नावे ‘ए मुश्त-ए-खाक’, ‘डंक’ यांसारखे अनेक प्रसिद्ध शो आहेत. याशिवाय ती अनेक गाण्यांमध्येही झळकली आहे.
