मराठी, हिंदी, तेलुगू, तमिळ अशा अनेक भाषांत काम करत प्रेक्षकांचे मनोरंजन करणारे प्रसिद्ध अभिनेते सयाजी शिंदे यांच्या प्रकृतीबाबत नुकतीच एक माहिती समोर येत आहे. सयाजी शिंदे यांच्या छातीत अचानक दुखू लागल्याने त्यांना तातडीने साताऱ्यातील रुग्णालयात दाखल करण्यात आले. काल (११ एप्रिल २०२४) रोजी छातीत त्रास जाणवू लागल्याने त्यांना रुग्णालयात दाखल करण्यात आले असून त्यांच्यावर हृदयाची शस्त्रक्रिया पार पडली आहे.
‘एबीपी माझा’च्या वृत्तानुसार, सयाजी शिंदेंची प्रकृती आता स्थिर असल्याची माहिती डॉक्टरांनी दिली आहे. त्यांच्यावर उपचार करणारे डॉ. सोमनाथ साबळे यांनी प्रकृतीबद्दल माहिती देताना असं म्हटलं की, “सयाजी शिंदेंना काही दिवसांपूर्वी असवस्थता जाणवत होती. त्यामुळे त्यांनी काही तपासण्या करुन घेतल्या होत्या. दरम्यान ECG मध्ये त्यांच्या हृदयाच्या एका छोट्या भागाची हालचाल थोडी कमी असल्याचं जाणवलं होतं. त्यांची स्ट्रेस टेस्टही करण्यात आली होती. यातही काही दोष सापडले. यावर आम्ही त्यांना अँजिओग्राफी करण्याचा सल्ला दिला होता.”
आणखी वाचा – आजचे राशी भविष्य : आज सौभाग्य योगाचा शुभ संयोग, ‘या’ पाच राशींसाठी आजचा दिवस ठरणार फलदायी, जाणून घ्या…
यापुढे त्यांनी असं म्हटलं की, “पुढे त्यांच्यावर आम्ही अँजिओग्राफी केल्यानंतर त्यांच्या हृदयाच्या तीन रक्तवाहिन्यांमधील दोन रक्तवाहिन्या पूर्णपणे व्यवस्थित होत्या आणि उजव्या बाजूच्या एका रक्तवाहिनीमध्ये ९९ टक्के ब्लॉक आढळला. तपासणीमध्ये आलेला दोष आम्ही काढून टाकला असून हृदयविकाराचा झटका येण्याआधीच ते जागृत होते. पण आता त्यांची प्रकृती पूर्णत: स्थिर आहे आणि लवकरच त्यांना रुग्णालयातून घरी सोडण्यात येणार आहे.”
त्यांच्या प्रकृतीबाबतची माहिती समोर येताच त्यांचे अनेक चाहतेमंडळी त्यांच्यासाठी प्रार्थना करत आहे. दरम्यान, आपल्या अभिनयाने चर्चेत राहणारे सायाजी शिंदे हे त्यांच्या सामाजिक कार्यामुळेही चांगले चचर्चेत असतात. त्याचबरोबर त्यांचे वृक्षप्रेमही अगदी जगजाहीर आहे. सयाजी शिंदे हे त्यांच्या संस्थेअंतर्गत वृक्षरोपणाचे कामही करतात. सयाजी शिंदे यांनी आजवर मराठी-हिंदीसह कन्नड, तामिळ, मल्याळम तसेच तेलुगू चित्रपटांतून आपल्या अभिनयाची छाप सर्व प्रेक्षकांवर सोडली आहे.