अभिनेत्री नोरा फतेहीने तिच्या नृत्याने व अदाकारीने सिनेविश्वात स्वतःच स्थान निर्माण केलं आहे. अनेकदा नोरा तिच्या नृत्यामुळे व लूकमुळे चर्चेत असते. नोराचा डान्स लोकांना खूप आवडतो. अशातच आता नोरा फतेही पुन्हा एकदा चर्चेत आली आहे. चित्रपटसृष्टीत तिच्याबरोबर झालेल्या वाईट वागणुकीबद्दल नोराने केलेलं भाष्य चर्चेत आलं आहे. नोराने केलेलं भाष्य ऐकून चाहत्यांना धक्का बसला आहे. (Nora Fatehi On Film Industry)
नोरा फतेहीने नुकतीच रणवीर अलाहाबादियाच्या पॉडकास्टमध्ये हजेरी लावली होती. यावेळी बोलताना तिने चित्रपट जगतातील लोकांनी केलेल्या अपमानाबद्दल खुलेपणाने भाष्य केलं. नोराने नुकतीच दिलेली ही मुलाखत सध्या सर्वत्र पसरली आहे. कारण नोराने यावेळी केलेलं भाष्य चर्चेत आलं आहे. नोराने यावेळी सांगितलं की, “कधीकधी तिला अशा लोकांचा सामना करावा लागतो ज्यामुळे तिला विचित्र वाटते”. यामागचे कारण स्पष्ट करताना ती म्हणाली की, “त्या लोकांचा हेतू योग्य नाही”.
नोरा फतेहीने पॉडकास्टमध्ये खुलासा केला की, “ती अनेकदा स्वत:बरोबर असं होताना पाहते. अलीकडे त्याला पुन्हा अशीच वागणूक मिळाली आहे. काही लोकांना हे समजत नाही. लोकांना आश्चर्य वाटते की, ही मुलगी इथे कशी आली?, आमची मुलगी का येऊ शकली नाही?, यामुळे लोकांमध्ये प्रचंड संताप असल्याचे तिने यावेळी सांगितले. नोराने स्वतःबद्दल असंही सांगितले की, ‘ती इतर मुलींसारखी नाही, जी पुरुष कलाकारांसमोर नम्रपणे बोलेल’.
नोरा म्हणाली की, “जर मला वाटत असेल की काहीतरी चुकीचे आहे, तर मी त्याबद्दल नक्कीच बोलेन. काही लोकांना ते आवडत नाही. काही लोकांना अशा मुली आवडतात, ज्या शांत, सभ्य असतात. तर काही त्यांना कामाची गरज असल्यासारखं दाखवतात. अशा मुलींसारखं माझं नाही आहे ज्या दुबळेपणाचा आव आणतात. आणि कोणालाही असं करण्याचा अधिकार नाही. ही मुलगी सिनेसृष्टीत काय काम करत आहे. ही मुलगी फिल्मी दुनियेत का आहे?, इथे हिचं काम करण्याचं काही खास कारण नाही”.
