Sayaji Shinde : प्रसिद्ध अभिनेते सयाजी शिंदे यांनी उभारलेल्या बीड तालुक्यातील पालवन परिसरातील ‘ सह्याद्री देवराई ’ प्रकल्पाला बुधवारी सायंकाळी भीषण आग लागली. या आगीने रौद्ररूप धारण केल्यामुळे डोंगरावरील हजारो झाडे, औषधी वनस्पती आणि असंख्य पशू-पक्षी होरपळून गेल्याची भीती व्यक्त करण्यात आली आहे. वाऱ्याचा वेग जास्त असल्याने काही आग संपूर्ण सह्याद्री देवराईमध्ये पसरली. स्थानिक नागरिकांनी तातडीने वन विभागाला याची माहिती देत वन विभागाचे लगेचच अधिकारी आणि कर्मचारी तिथे पोहोचले. स्थानिक ग्रामस्थ आणि वन कर्मचारी आग आटोक्यात आणण्यासाठी प्रयत्न करत होते. पण आग विझवण्यात मोठे अडथळे येत असल्याचं समजत आहे.
प्रसिद्ध अभिनेते सयाजी शिंदे यांनी या ओसाड डोंगराला हिरवागार करण्यासाठी प्रचंड मेहनत केली होती.या देवराईत अनेक दुर्मिळ झाडांची जोपासना केली जात होती. परंतु, या आगीत अनेक पक्ष्यांची घरटी, अंडी आणि जमिनीवरील लहान जीवजंतू मृत्युमुखी पडल्याची दाट शक्यता आहे. दरवर्षी उन्हाळ्यात डोंगरांना आग लागण्याचे प्रमाण वाढतं आहे. टँकरच्या पाण्यावर ही झाडे लहानाची मोठी केली, पण आज ती डोळ्यादेखत जळताना पाहून मन हेलावून जात आहे, अशी भावना पर्यावरणप्रेमींनी व्यक्त केली आहे.
आणखी वाचा – ‘बिग बॉस मराठी’ फेम अभिनेत्याचा विवाहसोहळा संपन्न, पारंपरिक लूकने वेधलं लक्ष; फोटो समोर
सयाजी शिंदे आणि त्यांच्या टीमने वर्षानुवर्षे घेतलेल्या मेहनतीवर या आगीमुळे अक्षरशः पाणी फेरलं गेलं आहे. काल सायंकाळच्या सुमारास पालवन डोंगररांगेत अचानक धुराचे लोट दिसू लागले.
