झी मराठी वाहिनीवरील सातव्या मुलीची सातवी मुलगी या मालिकेतील अनेक ननवनवीन ट्विस्टमुळे ही मालिका प्रेक्षकांचे चांगलेच लक्ष वेधून घेत आहे. मालिकेत रुपालीच्या वशमधून सगळे बाहेर आल्यानंतर एक नवीन ट्विस्ट आला असल्याचे पाहायला मिळत आहे आणि हा नवीन ट्विस्ट म्हणजे नेत्राच्या आई होण्याचा. मालिकेत नेत्राने नुकतीच आई होणार असल्याची खुशखबर दिली आहे. त्यामुळे राजाध्यक्षांच्या घरी सध्या आनंदाचं वातावरण आहे.
अशातच मालिकेत नुकताच नेत्राने दिलेल्या खुशखबरमुळे आनंदी वातावरण असल्याचे पाहायला मिळाले. मालिकेत नुकत्याच झालेल्या भागामध्ये नेत्रा छान साडी घालून घरच्या हॉलमध्ये येते तेव्हा अद्वैत तिच्याकडे पाहतच बसतो. यावर घरातील सगळे नेत्रा व अद्वैतची मस्करी करतात. नेत्रा व अद्वैत यांनी दिलेल्या या खुशखबरनिमित्त राजाध्यक्ष कुटुंबीय जेवायला जातात.
यावेळी सगळेजण हे कुटुंब असंच एकत्र राहिले पाहिजे अशी इच्छा व्यक्त करतात. यावेळी कुटुंबातील प्रत्येकजण त्यांच्या आयुष्यातील या नवीन सुरुवातीबद्दल आपापली मते व्यक्त करतात. सगळेजण याबद्दल नेत्रा व इंद्राणी यांचे आभार मानतात. तसेच अद्वैतही वडील होण्याचा आनंद व्यक्त करतो. यावेळी नेत्राही तिची इच्छा व्यक्त करत “तुम्हा सर्वांच्या इच्छा पूर्ण व्हाव्या. हीच माझी इच्छा आहे” असं म्हणते.
आणखी वाचा – Video : पारू, आदित्य व दिशा यांचा ‘पुष्पा-२’च्या ‘अंगारो सा…’ गाण्यावर भन्नाट डान्स, सेटवरचा व्हिडीओ व्हायरल
अशातच मालिकेच्या पुढील भागात राजाध्यक्षांच्या घरात रुपाली परत आली आहे. घरात येताच ती तिच्या सासूच्या फोटोकडे बघून “हे कसं झालं? तुम्ही आम्हाला कशा सोडून गेल्या हे कळलं पण नाही” असं म्हणताना दिसत आहे. यानंतर तिथे नेत्रा येते तेव्हा रुपाली नेत्राला “हे सगळं कसं झालं” असं म्हणते. मात्र यावर नेत्रा रुपालीचा गळा पकडते आणि “तू जीवंत कसा विरोचका?” असं म्हणते.
यामुळे आता मालिकेत एकीकडे नेत्राच्या गरोदरपणाच्या बातमीने सर्व आनंदी आहेत. तर दूसरीकडे रुपाली घरात आल्याने नेत्राला विरोचक जीवंत कसा? असा प्रश्न पडला आहे. त्यामुळे मालिकेत आता पुढे काय होणार? हे पाहण्यासाठी प्रेक्षक खूपच उत्सुक आहेत.