छोट्या पडद्यावरील ‘सातव्या मुलीची सातवी मुलगी’ या मालिकेतील नेत्रा भूमिकेतून प्रेक्षकांचे मनोरंजन करणारी अभिनेत्री म्हणजे तितीक्षा तावडे. तितीक्षाने दोन महिन्यांपूर्वी अभिनेता सिद्धार्थ बोडकेसह लग्नगाठ बांधली. २६ फेब्रुवारी रोजी तितीक्षा व सिद्धार्थ यांचा अगदी शाही पद्धतीने विवाह सोहळा पार पडला. दोघांच्या लग्नाची सोशल मीडियावर बरीच चर्चा रंगलेली पाहायला मिळाली. त्यांच्या लग्नाचे अनेक फोटो व व्हिडीओ सोशल मीडियावर व्हायरल झाले होते.
अशातच या नवविवाहित दाम्पत्याचा नुकताच पहिला गुढीपाडवा साजरा झाला. प्रत्येक नवीन लग्न झालेल्या जोडप्यांसाठी पहिला गुढीपाडवा हा कायमच खास असतो आणि तितीक्षा-सिद्धार्थसाठी ही यंदाचा गुढीपाडवा अगदी खास होता. या गुढीपाडव्याचे काही खास फोटोही त्यांनी सोशल मीडियावर शेअर केले. या फोटोमध्ये तितीक्षाने हिरव्या रंगाची साडी नेसलेली पाहायला मिळत आहे, तर सिद्धार्थने फिकट पिवळ्या रंगाचा कुर्ता परिधान केला असल्याचे पाहायला मिळत आहे.
यंदाचा हा पहिला गुढीपाडवा तितीक्षाने आपल्या सासरी म्हणजेच नाशिकमध्ये साजरा केला. पहिल्या गुढीपाडव्याच्या या खास फोटोमध्ये तितीक्षाच्या सासरच्या घरची झलक पाहायला मिळत आहे. तितीक्षाचे सासरचे घर हे मोठ्या अपार्टमेंटमध्ये असून घराच्या मोठ्या बाल्कनीमध्ये त्यांनी गुढी उभारली असल्याचे या फोटोमध्ये दिसत आहे. त्याचबरोबर तितीक्षाने या फोटोमध्ये तिच्या सासू-सासऱ्यांसह एक छान सेल्फी फोटोही काढला आहे.
काही दिवसांपूर्वी तितीक्षाच्या सासूबाईंनी त्यांची लाडकी सून म्हणजेच तितीक्षा तावडे घरी येणार असल्याचा आनंद व्यक्त केला होता. अशातच तितीक्षाच्या या फोटोंनीदेखील तिच्या चाहत्यांचे लक्ष वेधून घेतले आहे. दरम्यान, दोघांच्या कामाबद्दल बोलायचे झाले तर तितीक्षा सध्या झी मराठीवरील ‘सातव्या मुलीची सातवी मुलगी’ मालिकेद्वारे प्रेक्षकांचं मनोरंजन करत आहे. तर सिद्धार्थचा लवकरच ‘जहांगीर नॅशनल युनिव्हर्सिटी’ या चित्रपट प्रदर्शित होणार आहे.