स्टँडअप कॉमेडी सध्या खूप लोकप्रिय होत आहे. कॉमेडी शोपेक्षा स्टँडअप कॉमेडी शोची लोकांमध्ये जास्त चर्चा होते. गेल्या काही वर्षांत तरुणांमध्ये याची क्रेझ चांगलीच वाढली आहे. आजवर अनेक मराठीसह हिंदीमध्ये स्टँड अप कॉमेडी करणारे अनेक कॉमेडियन आहेत, ज्यांनी त्यांच्या विनोदी सादरीकरणांनी आपला वेगळाच ठसा उमटवला आणि लाखो चाहत्यांच्या हृदयावर राज्य केले आहे.
खरंतर स्टँडअप कॉमेडीला जुना इतिहास आहे, पू. ल. देशपांडेंनी मराठी स्टँडअप कॉमेडीची सुरुवात केली असं म्हटलं तर अतिशयोक्ती होणार नाही. पु. ल. देशपांडे यांच्या ‘म्हैस’, ‘अंतु बरवा’, ‘बटाट्याची चाळ’ या कलाकृती रसिकांनी अक्षरश: डोक्यावर घेतल्या. एका सभागृहाच्या मंचावर उभे राहून, पु.लं.नी सादर केलेल्या या कलाकृती म्हणजे मराठीतील पहिली स्टँड अप कॉमेडीच म्हणावी लागेल. परंतु काळापरत्वे यात अनेक बदल होत गेले.
हल्ली स्टँडअप कॉमेडी करण्यासाठी कॉमेडियन कोणत्याही पातळीला जातात. विनोद करताना शिव्यांचा सर्रास वापर, प्रेक्षकांची खिल्ली उडवणे, एखाद्या व्यंगावर विनोद करणे हे प्रकार खूपच वाढले आहेत. यावर गायक, संगीतकार सलील कुलकर्णींनी एक उपहासात्मक पोस्ट शेअर केली आहे. सलील कुलकर्णींनी त्यांच्या इन्स्टाग्राम अकाऊंटद्वारे त्यांचा एक फोटो पोस्ट करत ही पोस्ट लिहिली आहे.
सलील यांनी त्यांच्या या पोस्टमध्ये असं म्हटलं आहे की, “स्टँडअप कॉमेडीचे क्लासेस निघाले आहेत असं आत्ता ऐकलं. कौटुंबिक विनोद.. अश्लील विनोद… राजकीय विनोद… प्रेक्षकांना प्रश्न विचारून त्यांची टर उडवणे, प्रत्येक वाक्यात शिव्या आणि आपापली स्थानिक भाषा वापरणे म्हणजेच विनोद करणे… असे अनेक प्रकार आहेत असे सूत्रांनी सांगितले”.
यापुढे त्यांनी असं म्हटलं आहे की, “शिक्षण.. व्यक्तिमत्त्व.. आवाज.. कसलीही अट नाही.. आपण विनोदी आहोतच, आपणच विनोदी आहोत आणि आपण बोलतोय ते तुफान विनोदीच आहे हा आत्मविश्वास आणि प्रत्येक वाक्यानंतर त्यातला विनोद शोधून समोरच्या लोकांमधला एखादा माणूस तरी हसेपर्यंत आपण गप्प राहून मिश्किल किंवा बधीर चेहरा करून बघत राहायची तयारी ठेवणे एवढीच काय ती अट असते.”
या पोस्टसह सलील यांनी “उभे राहून काहीही बोला त्याला विनोद म्हणा” असा एक हॅशटॅगदेखील लिहिला आहे. दरम्यान सलील यांनी या पोस्टद्वारे नक्की कुणावर निशाणा साधला आहे? हे कळले नाही. पण त्यांची ही पोस्ट सध्या सोशल मीडियावर चांगलीच व्हायरल होत आहे.
