मराठीबरोबरच हिंदी सिनेसृष्टीतदेखील आपल्या अभिनयाने प्रेक्षकांचे मनोरंजन करणारी अभिनेत्री म्हणजे सई ताम्हणकर. सध्याचा मराठीतला आघाडीचा अभिनेता म्हणजे सिद्धार्थ चांदेकर. आत्तापर्यंत या दोघांनी अनेक सुपरहिट चित्रपटांमध्ये काम केले आहे. क्लासमेट चित्रपटात दोघांनी एकत्र काम केले होते. मराठीतील हे लोकप्रिय कलाकार आता प्रेक्षकांच्या भेटीला नवीन चित्रपट घेऊन येत आहेत. ‘श्रीदेवी प्रसन्न’ चित्रपटातून दोघे प्रेक्षकांच्या भेटीला येणार आहे. काही दिवसांपूर्वी या चित्रपटाचा टिझर प्रदर्शित करण्यात आला होता. चित्रपटाच्या टीजरने चाहत्यांमध्ये उत्सुकता निर्माण केली होती.
अशातच आता या चित्रपटाचा ट्रेलरही भेटीला आला आहे. सिद्धार्थ व सईने आपल्या इन्स्टाग्राम अकाऊंटद्वारे हा ट्रेलर शेअर केला आहे. ट्रेलरमध्ये सिद्धार्थ म्हणजेच प्रसन्नची आई त्याच्या लग्नासाठी मागे लागताना दिसते. तर सई अर्थात श्रीदेवी लग्न करायला उत्सुक असल्याची बघायला मिळत आहे. हे दोघे अरेंज मॅरेज करण्यासाठी एकमेकांना भेटतात आणि तिथून त्यांच्या प्रेमकथेची सुरुवात होते.
हेही वाचा – टीआरपीच्या शर्यतीत ‘ठरलं तर मग’ मालिकेची बाजी, पण या मालिकांचा प्रेक्षकवर्ग घसरला, पाहा संपूर्ण यादी
चित्रपटात सई म्हणजेच श्रीदेवीचे कुटुंब हे अत्यंत फिल्मी दाखवण्यात आले आहे. त्यामुळे श्रीदेवीच्या आजीमुळे या चित्रपटात काय नवीन ट्विस्ट येतात हे पाहणे उत्सुकतेचे ठरणार आहे. आता प्रसन्न-श्रीदेवीचे लग्न जुळणार का? दोघे नवरा-बायको बनणार का? हे तुम्हाला चित्रपट बघितल्यावरच लक्षात येईल. येत्या २ फेब्रुवारीला हा सिनेमा चित्रपटगृहांमध्ये प्रदर्शित होणार आहे.
टीप्स मराठी प्रस्तुत या चित्रपटाची निर्मिती कुमार तौरानी यांनी केली आहे. या चित्रपटात सई व सिद्धार्थ यांच्याबरोबर संजय मोने, शुभांगी गोखले, समीर खांडेकर, रसिका सुनील, वंदना सरदेसाई, पूजा वानखडे, रमाकांत डायमा, सुलभा आर्या, पल्लवी परांजपे, सिद्धार्थ महाशब्दे, सिद्धार्थ बोडके, जियांश पराडे यांच्याही प्रमुख भूमिका आहेत.