‘सहकुटुंब सहपरिवार’ या लोकप्रिय मालिकेने प्रेक्षकांचा निरोप घेतला आहे. या मालिकेने गेली अनेक वर्ष प्रेक्षकांच्या मनावर राज्य केलं. मालिकेतील प्रत्येक पात्र प्रेक्षकांचं आवडतं झालं होतं. अंजी -पशा, सूर्या -सरू, यांची जोडीही प्रेक्षकांची आवडती होती. मालिकेची कथा पूर्ण झाल्याने या मालिकेने प्रेक्षकांचा निरोप घेतला आहे. मालिकेत जसं की हे कुटुंब प्रत्येक संकटावेळी, सुख दुःखावेळी सहपरिवार दिसत होतं, तसं आता मालिका संपल्यानंतरही हे कुटुंब सहपरिवार धमाल मस्ती करताना दिसत आहे. (Sahkutumb Sahparivar Actors on Trip)
आज ‘सहकुटुंब सहपरिवार’ या मालिकेला संपून बराच काळ लोटला असला तरी मालिकेतील कलाकारांचं ऑफस्क्रिन बॉण्डिंग अजूनही ऑनस्क्रीन बॉण्डिंगप्रमाणे घट्ट आहे. कलाकारांनी मालिका संपल्यानंतर आपापल्या नव्या कामाला सुरुवात जरी केली असली तरी त्यांनी वेळात वेळ काढून सहकुटुंब एकत्र येत एक छोटीशी ट्रिप एन्जॉय केली आहे.
मालिकेतील कलाकारांनी त्यांच्या इंस्टाग्राम स्टोरीवर निसर्गाच्या सान्निध्यात मज्जा मस्ती करतानाचे व्हिडिओ पोस्ट करत ही माहिती दिली आहे. अभिनेत्री साक्षी गांधी हिने हा व्हिडीओ शेअर केला आहे. यांत मालिकेतील कलाकार स्विमिंग पुलचा तसेच धबधब्याखाली आनंद लुटताना दिसत आहेत, शिवाय एकत्र ते भोजन करताना ही दिसत आहेत. इतकंच नव्हे तर कलाकारांनी गाणी म्हणतानाचा व्हिडिओ ही शेअर केला आहे. आणि शेवटी या कलाकारांनी ‘सहकुटुंब सहपरिवार’ मालिकेचा एक भाग ही एकत्र बसून पाहिला. ‘लेट पण थेट’ असं कॅप्शन देत साक्षीने ‘सहकुटुंब सहपरिवार’ धमाल करतानाचा व्हिडीओ शेअर केला आहे.
या ट्रीपमध्ये सुनील बर्वे, नंदिता धुरी, आकाश नलावडे, अमेय बर्वे, रुचिका धुरी, आकाश शिंदे या कलाकारांना धमाल करताना पाहायला मिळालं. तर किशोरी आंबिये, निमिष कुलकर्णी, पूजा पुरंदरे, कोमल कुंभार यांना त्यांच्या व्यस्त श्येड्युलमधून या ट्रीपसाठी जाता आलं नाही, त्यामुळे या कलाकारांना त्यांनी खूप मिस केलं असल्याचंही त्यांनी म्हटलं. तर गैरहजर असलेल्या कलाकारांनी या व्हिडिओवर कमेंट करत ही ट्रिप मिस केल्याचं म्हटलं.