वयाची पन्नाशी ओलांडलेल्या ऐश्वर्या नारकर यांच्या सौंदर्याचे लाखो चाहते दिवाने आहेत. अतिशय निरागस, मनमोहक, लाघवी दिसणाऱ्या अभिनेत्रींमध्ये या अभिनेत्रीचं नाव आवर्जून घेतलं जातं. ऐश्वर्या नारकर यांनी त्यांच्या फोटोशूटने, अभिनयाने चाहत्यांना कायमच भुरळ घातली. त्यांच्या फिट दिसण्याचं श्रेय त्या पूर्णतः फिटनेसला देतात. ऐश्वर्या या सोशल मीडियावरही बऱ्यापैकी सक्रिय असतात. ऐश्वर्या यांच्या सुंदरतेची भुरळ चाहत्यावर्गामध्येच नसून त्यांच्या पतीलाही पडली होती. (Avinash Narkar Romantic Post)
ऐश्वर्या नारकर यांचे पती अविनाश नारकर हे देखील अभिनेते असून मालिकांमधून ते प्रेक्षकांच्या भेटीस येत असतात. शिवाय ऐश्वर्या यांच्यासह नेहमीच ते ट्रेंडिंग रील बनवून सोशल मीडियावरून शेअर देखील करत असतात. वयाची पन्नाशी ओलांडलेल्या या जोडप्यात तरुणाईला लाजवेल इतकी एनर्जी आहे. अनेकदा ते या वयात ट्रेंडिंग रील शेअर केल्याने नेटकऱ्यांच्या कचाट्यात अडकतात. मात्र ऐश्वर्या नेटकऱ्यांच्या प्रश्नाला वेळोवेळी उत्तरं देत त्यांच्यावर पलटवार करतात. नुकतीच ही जोडी रोमँटिक डेटवर देखील गेली होती, याचा व्हिडीओ ऐश्वर्या यांनी शेअर देखील केला आहे.
आता त्यांच्या या रोमँटिक डेटनंतर अविनाश यांना २७ वर्षांपूर्वी ऐश्वर्या यांच्या प्रेमात पडलेले दिवस आठवत आहेत. याचा एक व्हिडीओ नुकताच त्यांनी इंस्टग्राम अकाऊंटवरून शेअर केला आहे. “बघितलं पोरी तुला पहिल्यांदा, अडकला जीव माझा पहिल्यांदा, मनामध्ये गुदगुल्या पहिल्यांदा, स्लो मोशन झालंय पहिल्यांदा, पहिल्यांदा, पहिल्यांदा” या गाण्यावर अविनाश यांनी उत्तम अभिनय करत आणि हे गाणं गुणगुणत २७ वर्षांपूर्वी पहिल्यांदा जेव्हा बायकोला पाहिलं तो दिवस आठवला. त्यांनी या व्हिडिओवर असंही लिहिलं आहे की, तो दिवस आठवला ज्या दिवशी मी तिला प्रपोज केलं होतं.
या व्हिडीओसह त्यांनी कॅप्शन देत असंही म्हटलं आहे की, “२७ वर्षे झाली. वेळ पटकन निघून गेला. फक्त आठवणी तयार करा आणि आयुष्याचा आनंद घ्या. मी ही ऐश्वर्याला पहिल्यांदा पाहिलं तेव्हां माझंही असंच काहीसं झालं होतं…!! आईशप्पथ…!!” असं म्हणत त्यांनी त्यांच्या प्रेमाच्या दिवसांची आठवण काढली.
