हिंदी मालिकांमुळे नावारुपाला आलेली अभिनेत्री म्हणजे रुबीना दिलैक. रुबीनाने छोट्या पडद्यावर उत्तमोत्तम भूमिका साकारत प्रेक्षकांना आपलसं केलं. ‘बिग बॉस’ हिंदीमध्येही ती पतीसह सहभागी झाली होती. मात्र काही महिने ते कलाविश्वापासून दूर आहे. आता यामागचं कारण समोर आलं आहे. रुबीनाने चाहत्यांना आनंदाची बातमी दिली आहे. तिने गरोदर असल्याचं सांगत खास फोटो शेअर केले आहेत. गेल्या काही दिवसांपासून रुबीनाच्या गरोदरपणाच्या चर्चा रंगल्या होत्या. अखेरीस या चर्चांवर शिक्कामोर्तब झाला आहे.
रुबीनाने शेअर केलेल्या फोटोंमध्ये तिचं बेबी बंप दिसत आहे. रुबीना गरोदर असल्याच्या गेल्या काही दिवसांपासून अनेक चर्चा होत्या. तिचे विमानामधील काही फोटोही व्हायरल झाले होते. त्या फोटोंमध्ये रुबीनाचं बेबी बंप दिसत होतं. मात्र गरोदरपणाच्या चर्चांवर तिने मौन कायम राखलं होतं. आता अखेरीस पती अभिनवरबरोबर फोटो शेअर करत तिने गुडन्यूज दिली.
गेले काही दिवस रुबीना व अभिनव परदेशात व्हॅकेशन एण्जॉय करताना दिसले. आताही तिने शेअर केलेले फोटो हे अमेरिकेमधील असल्याचं बोललं जात आहे. एका जहाजावर पोझ देताना दोघंही या फोटोमध्ये दिसत आहेत. तसेच रुबीनाच्या चेहऱ्यावर प्रेग्नंसी ग्लो दिसत आहे. रुबीनाने फोटो शेअर करताच तिच्यावर शुभेच्छांचा वर्षाव झाला.
अनेक कलाकार मंडळींनी रुबीना व अभिनवचं अभिनंदन केलं. लग्नाच्या पाच वर्षांनंतर रुबीनाने आई होण्याचा निर्णय घेतला आहे. २१ जून २०१८मध्ये रुबीना व अभिनवचं थाटामाटात लग्न पार पडलं. लग्नानंतर रुबीना व अभिनवमध्ये बरेच वादही झाले. मात्र ‘बिग बॉस’ हिंदीमध्ये रुबीना व अभिनव यांच्यामधील नात्याला नवं वळण मिळालं.