आज गुढीपाडव्यानिमित्त सर्वत्र आनंदाचं व उत्साहाचं वातावरण आहे. हिंदू पंचांगानुसार, चैत्र शुद्ध प्रतिपदेला, म्हणजेच वसंत ऋतुच्या पहिल्या दिवशी गुढीपाडव्याचा सण साजरा केला जातो. गुढीपाडवा या सणाची आपण सर्वच जणं अगदी आतुरतेने वाट पाहात असतो. अगदी उत्साहात कुटुंबाबरोबर, मित्रमैत्रिणींबरोबर तसंच प्रियजनांबरोबर गुढीपाडवा साजरा केला जातो. सामान्य कुटुंबियांबरोबरच मनोरंजन कलाविश्वातील कलाकार मंडळीदेखील आजचा हा खास सण साजरा करत आहे.
अशातच बॉलिवूड व मराठी मनोरंजन विश्वातील लोकप्रिय जोडी रितेश व जिनिलीयानेदेखील गुढीपाडव्यानिमित्त जंगी तयारी करत आहेत. जिनिलीया देशमुखने गुढी रितेशसह आपल्या दोन मुलांचा गुढी सजवतानाचा व्हिडीओ शेअर करत चाहत्यांना गुढीपाडव्याचा शुभेच्छा दिल्या आहेत. जिनिलीयाने इन्स्टाग्राम स्टोरीवर एक व्हिडीओ शेअर केला आहे. ज्यामध्ये रितेश देशमुख आपल्या लाडक्या मुलांबरोबर रिआन व राहिलसह गुढी सजवताना दिसत आहे.
नवऱ्याचा व मुलांचाहा खास व्हिडीओ शेअर करत जिनिलीयाने त्यावर “पहाटे आमची गुढी तयार होतं आहे. गुढीपाडव्याच्या हार्दिक शुभेच्छा.” असं लिहिलं आहे. एवढंच नाहीतर जिनिलीयाने गुढीपाडव्याच्या शुभेच्छा देत रितेशबरोबरचा एक मजेशीर व्हिडीओ देखील शेअर केला आहे. यामध्ये रितेश कपड्यांच्या घड्या घालत आपण घरात काम करण्यासाठी एक नोकर ठेवूया का? असं विचारतो. यावर जिनिलीया “तू है तो मुझे फिर और क्या चाहिये” असं म्हणत त्याच्याकडे घडी घालण्यासाठी आणखी कपडे देते.
दरम्यान, रितेश-जिनिलीया यांनी कायमच प्रत्येक सण साजरे करतानाचे काही खास क्षण सोशल मीडियावर शेअर केले आहेत. आजच्या या मोबाइलच्या व तंत्रज्ञानाच्याया जगात मुलांना आपली संस्कृती, रुढी व परंपरा शिकवण्यामुळे त्यांचे कायमच कौतुक केले जाते. ते दोघं नेहमीच आपली संस्कृती जपत, मुलांवरही संस्कृतीचा वारसा जपण्याचे संस्कार करत असतात. अशातच त्यांचा हा व्हिडीओही चर्चेत आहे.
