दिग्दर्शक व अभिनेते राकेश रोशन यांच्या तब्येतीबाबत महत्त्वपूर्ण माहिती समोर आली आहे. १६ जुलैला राकेश यांना शारिरीक त्रास जाणवू लागला. तातडीने त्यांना रुग्णालयात भरती करण्यात आलं. राकेश यांच्या मानेची एंजिओप्लास्टी करण्यात आली आहे. त्यांचं शारीरिक दुखणं वाढलं होतं. अधिक त्रास जाणवू लागल्यानंतर मुंबईतील कोकीलाबेन रुग्णालयात त्यांना भरती करण्यात आलं. आता त्यांच्या तब्येतीबाबत मुलगी सुनैना रोशनने माहिती दिली आहे. राकेश यांच्यावर रुग्णालयात उपचार सुरु आहेत. पण आता त्यांची नेमकी परिस्थिती काय?, त्यांना नक्की काय त्रास झाला होता? याबबात सुनैनाने सांगितलं आहे. राकेश यांच्या उत्तम आरोग्यासाठी चाहतेही प्रार्थना करत आहेत. (rakesh roshan health update)
राकेश यांच्या मानेची तातडीने एंजिओप्लास्टी करण्यात आली. त्यानंतर त्यांच्या तब्येतीमध्ये सुधारणा होत असल्याचं पाहायला मिळत आहे. सुनैनाने राकेश यांच्या तब्येतीबाबत अमर उजालाशी संवाद साधला. सुनैना म्हणाली, “हो वडिलांच्या मानेची एंजिओप्लास्टी करण्यात आली आहे. पण आता ते एकदम ठिक आहेत. आता चिंता करण्यासारखं काहीच नाही. ते आराम करत आहेत. आयसीयुमधून त्यांना जनरल वॉर्डमध्ये आणण्यात आलं आहे”.
आणखी वाचा – वयाच्या ५३व्या वर्षी दाक्षिणात्य अभिनेत्याचे निधन, उपचारासाठी आर्थिक मदतही मागितलेली पण…; किडनी फेल…
राकेश यांना रुग्णालयात अचानक भरती केल्यामुळे विविध चर्चा रंगल्या होत्या. इंडिया फोरमच्या वृत्तानुसार, कुटुंबातील प्रत्येक व्यक्ती त्यांची सेवा करत आहे. ऋतिक रोशन तर रुग्णालयात वडिलांसाठी थांबला आहे. त्यांच्याजवळ राहून वडिलांना आजारपणात साथ देण्याचं त्याने ठरवलं आहे. तसेच ऋतिकची गर्लफ्रेंड सबा अजाजही राकेश यांना भेटण्यासाठी गेली होती. संपूर्ण कुटुंबच राकेश यांच्या जोडीला आहे. पण आता शारीरिकदृष्ट्या ते अधिक उत्तम आहेत.
ऋतिकची पूर्वाश्रमीची पत्नी सुजैन खानने या संपूर्ण प्रकरणाबाबत काहीही बोलणं टाळलं आहे. कौटुंबिक मुद्द्यांवर काहीच बोलणार नसल्याचं सुजैनने सांगितलं आहे. राकेश मध्यंतरीच्या काही दिवसांमध्ये क्रिश ४ चित्रपटामुळे चर्चेत होते. या चित्रपटाचं दिग्दर्शन ते करणार होते. मात्र त्यांनी स्वतःचा निर्णय बदलला. चित्रपटाच्या दिग्दर्शनाची जबाबदारी त्यांनी ऋतिककडे दिली. ऋतिक दिग्दर्शक म्हणून पहिल्यांदाच प्रेक्षकांसमोर येणार आहे.
