सध्या सिनेसृष्टीत लग्नाचे वारे वाहू लागले आहेत. एकामागोमाग एक कलाकार मंडळी लग्नबंधनात अडकत असल्याचं पाहायला मिळत आहे. काही दिवसांपूर्वी अनंत अंबानी व राधिका मर्चंटच्या प्री-वेडिंग सोहळ्याची चांगलीच चर्चा रंगली. यानंतर सगळ्यांच्या नजरा बॉलिवूडमधील एका लोकप्रिय कपलकडे वळल्या आहेत. ही जोडी म्हणजे अभिनेता पुलकित सम्राट आणि अभिनेत्री क्रिती खरबंदा. पुलकित व क्रिती हे दोघेही आज दिल्लीत विवाहबंधनात अडकणार आहेत. (Pulkit Samrat And Kriti Kharbanda Wedding)
अशातच लग्नासाठी तयार झालेल्या नववराची शेरवानीमधील झलक समोर आली आहे, ज्यामध्ये तो आपल्या नवरी मुलीला आणण्यासाठी पूर्णपणे तयार झालेला दिसत आहे. लग्नासाठी तयार झालेल्या पुलकितचे हे फोटो सोशल मीडियावर व्हायरल होताना पाहायला मिळत आहेत. या फोटोंमध्ये तो लग्नासाठी आलेल्या पाहुणे मंडळींसह विंटेज कारमध्ये उभा असल्याचे दिसत आहे.
पुलकित व क्रितीचे लग्न दिल्ली एनसीआरच्या मानेसर येथील ITC ग्रँड भारत येथे होत आहे. भारतीय पद्धतीने दोघांचा लग्नसोहळा पार पडणार आहे. याआधी दोघांचा विवाहपूर्व कार्यक्रमही अगदी थाटामाटात पार पडला. १४ मार्च रोजी मेहंदी व संगीत कार्यक्रमाचे आयोजन करण्यात आले होते. यानिमित्ताने त्यांनी नूर झोरा यांच्या गिधा ग्रुपला बोलावून हळदी-संगीतचा दिमाखात कार्यक्रम पार पडला.
पुलकित-क्रितीच्या लग्नासाठी जवळचे कुटुंबीय, नातेवाईक व काही कलाकार मंडळीही उपस्थित आहेत. या लग्नाला जवळपास २०० पाहुणे येणार असल्याची माहिती समोर आली आहे. रिपोर्ट्सनुसार, या लग्नाला शाही टच देण्यासाठी सर्व गोष्टींची विशेष काळजी घेण्यात आली आहे. पुलकित व क्रितीच्या या भव्य लग्नाची सर्व व्यवस्था दिल्लीतूनच करण्यात आल्याचे वृत्त आहे. दोघांच्या लग्नात कोलकाता, बनारस, राजस्थान, मध्य प्रदेश, महाराष्ट्र व दिल्लीच्या सर्व खास पदार्थांचा आस्वाद घेता येणार असल्याची चर्चा आहे.