आयुष्यभर केलेली मेहनत एका चुकीनंतर धुळीला मिळाली तर होत्याचं नव्हतं होतं. असंच काहीसं सुप्रसिद्ध जोडप्याबरोबर घडलं आहे. पूजा बॅनर्जी व कुणाल वर्मा हे कलाक्षेत्रातील सुप्रसिद्ध जोडपं आहे. दोघांनीही आजवर अनेक सुपरहिट हिंदी मालिकांमध्ये काम करत नाव कमावलं. प्रसिद्धीसह पैसाही कमावला. मात्र एका चुकीच्या निर्णयामुळे पूजा व कुणालला आर्थिक अडचणींचा सामना करावा लागत आहे. एका जवळच्या मित्राच्या सांगण्यानुसार त्यांनी पैशांची गुंतवणूक केली. आयुष्यभराची बचत त्यांनी यासाठी केली होती. पण त्याच मित्राने पूजा व कुणालला फसवलं आहे. याचबाबत दोघांनी उघडपणे सांगितलं. (Puja Banerjee Kunal Verma fraud)
ईटाइम्सला दिलेल्या मुलाखतीत पुजाने म्हटलं की, “गेले दोन ते तीन महिने आमच्यासाठी खूप कठीण आहेत. पुढे काय होईल? याचा अंदाजही आम्हाला नाही. आमच्याबरोबर पैशांची फसवणूक झाली आहे. एक मोठी रक्कम आम्ही गमावली आहे. आता आम्हाला शुन्यापासून सुरुवात करावी लागणारी आहे. अशा परिस्थिती आम्हाला हार मानायची नाही. या फसवणूकीमध्ये आम्ही आमची संपूर्ण बचत गमावली आहे. तुम्ही सगळे आम्हाला पाठींबा द्या आणि आमच्यासाठी प्रार्थना करा. देवावर आम्हाला विश्वास आहे”.
कुणाल म्हणाला, “तुम्ही सतत तीन वर्ष कोणावर तरी विश्वास ठेवता तेव्हा तो सतत तुमच्याबरोबर असतो. तुमच्या घराचा, कुटुंबाचा तो एक भाग होतो. माझ्या कुटुंबालाही मी याबाबत काहीच सांगितलं नव्हतं. या घटनेमुळे आम्ही खूप रडलो. गेल्या काही महिन्यांपासून आम्ही खूप दुखावलो आहोत. आम्हाला फक्त तुमचा पाठिंबा हवा आहे. या संपूर्ण घटनेबाबत कुटुंबाला कळवणं आमच्यासाठी खूप कठीण होतं”.
पुढे तो म्हणाला, “पण आता कुटुंबियांना सगळं माहित झालं आहे. इतकं नुकसान व फसवणूकबाबत कुटुंबियांना सांगायलाच आम्हाला भीती वाटत होती. आमचं पूर्ण आयुष्य आम्ही खूप मेहनत केली. त्यानंतर पैसे आम्ही कमावले होते”. पूजा व कुणाल आता मोठ्या आर्थिक संकटात अडकले आहेत. कहानी घर घर की, करम अपना अपना, कस्तुरी, ये रिश्ता क्या कहलाता है अशा अनेक हिंदी कार्यक्रमांमध्ये पूजाने काम केलं आहे. २०२१नंतर तिने पहिल्या मुलाला जन्म दिला. आता दोघांनाही हिंमतीने पुन्हा उभं राहायचं आहे.
