‘टाईमपास’ फेम अभिनेता प्रथमेश परबने आजवर त्याच्या अभिनयाने प्रेक्षकांच्या मनात घर केलं आहे. अनेक विनोदी व इतर भूमिकांनी प्रथमेशने नेहमीच प्रेक्षकांची मनं जिंकली आहेत. अनेक चित्रपटांमधून प्रथमेश नेहमीच प्रेक्षकांच्या भेटीस येत असतो. चित्रपटांमधून प्रेक्षकांच्या भेटीस येणारा हा अभिनेता सोशल मीडियावरही तितकाच सक्रीय असतो. सोशल मीडियावरटो आपले अनेक फोटो व व्हिडीओ शेअर करत चाहत्यांच्या संपर्कात राहत असतो. तसेच तो त्याच्या पत्नीबरोबरचेही काही खास फोटो व व्हिडीओ शेअर करत असतो. काही दिवसांपूर्वीच प्रथमेशने प्रियसी क्षितिजा घोसाळकरबरोबर विवाहगाठ बांधली. तेव्हापासून ही जोडी चांगलीच चर्चेत आहे.
प्रथमेश व क्षितिजा सोशल मीडियावर बऱ्यापैकी सक्रिय असतात. ते नेहमीच सोशल मीडियावर काही ना काही शेअर करत चाहत्यांच्या संपर्कात राहत असतात. अशातच हे दोघे नुकतेच क्षितिजाच्या माहेरी म्हणजेच श्रीवर्धन येथे गेले होते. यावेळी दोघांनी निसर्गाच्या सानिध्यात मनमुरादपणे आनंद लुटला. याचे काही खास क्षणही त्यांनी सोशल मीडियाद्वारे शेअर केले होते. क्षितिजाने लग्नानंतर पाहिल्यांदाच माहेरी गेली होती. त्यामुळे तिच्यासाठी हे माहेरपण खूपच खास होते आणि याच खास भावना तिने सोशल मीडियावर एक खास पोस्ट करत व्यक्त केल्या आहेत.
क्षितिजाने शेअर केलेल्या पोस्टमध्ये तिने असं म्हटलं आहे की, “लग्नाच्या पाच महिन्यांनंतर, मी आणि माझे पती श्रीवर्धनमध्ये माझ्या माहेरी आलो आणि ही माझ्यासाठी एक कमालीची भावनिक होती. कारण लग्नानंतर माझ्या गावी परतण्याची ही माझी पहिलीच वेळ होती. या घराचा प्रत्येक कोपरा माझ्या बालपणीच्या आठवणी घेऊन आला. तरीही सर्व काही वेगळे आणि सारखेच वाटत होते”.
यापुढे तिने असं म्हटलं की, “घराच्या दारातून चालत, त्याच खोल्यांमध्ये बसणे, आणि माझ्याशेजारी माझ्या जोडीदाराबरोबर त्याच दृश्यांचा आनंद घेणं म्हणजे भूतकाळ आणि वर्तमानाचा सुंदर मिलाप होता. समुद्राच्या मंद वाऱ्यापासून ते स्थानिक संस्कृतीपर्यंत आणि माझ्या हृदयाजवळच्या प्रत्येक ठिकाणी आम्ही आमच्या नवीन आठवणी निर्माण केल्या”.
तसेच यापुढे तिने कृतज्ञतेची भावना व्यक्त करत असं म्हटलं की, “ही भेट म्हणजे भूतकाळ आणि वर्तमान यांचा सुंदर मिलाफ होता, कुटुंबाच्या अखंड प्रेमाचा आणि तुमच्या प्रिय व्यक्तीसोबत शेअर केल्याचा आनंद काही वेगळाच असतो. या मौल्यवान क्षणांसाठी आणि माझ्या पतीबरोबर माझ्या बालपणीच्या आठवणींना उजाळा देण्याची संधी मिळाल्याबद्दल मी कृतज्ञ आहे”.