Marathi actor Prashant Damle : टेलिव्हिजन, चित्रपट, आणि रंगमंच या तीनही माध्यमांवर महत्त्वपूर्ण कामगिरी करत रसिकांच्या मनात घर करणारे अभिनेते म्हणजे प्रशांत दामले. प्रशांत दामले यांनी आजवर अनेक कलाकृतींमधून प्रेक्षकांची मनं जिंकली. सध्या ते रंगमंचाकडे वळले आहेत. तब्बल तीन दशकांहून अधिक काळ त्यांनी स्वतःला रंगमंचाकडे वळविलं. आजही त्यांच्या प्रत्येक नाटकासाठी हाऊसफुल्लचे बोर्ड लागलेले पाहायला मिळतात. अशा या रंगकर्मीचा प्रवास आज १३,३०० भागांपर्यंत पोहोचला आहे. यानिमित्त अभिनेता संकर्षण कऱ्हाडेने खास पोस्ट लिहीत त्यांचं तोंडभरुन कौतुक केलं आहे. संकर्षणने अगदी मोजक्या अंदाजात प्रशांत दामले यांचा प्रवास मांडत त्यांच्या मेहनतीला दाद दिली आहे.
संकर्षणने असं म्हटलं की, “आज आमच्या दामले सरांचा वैयक्तीक १३,३०० वा प्रयोग आहे. ‘ते रा ह जा र ति न शे’वा प्रयोग… म्हणजे काय झाले हो…? एका प्रयोगाचे ३ तास जरी म्हणलं तरी आयुष्याचे ३९,९०० तास स्टेजवर आहे हा माणूस त्याच ऊर्जेने. आता तुम्ही म्हणाल व्यवसाय आहे त्यांचा, त्याचे पैसे मिळतात त्यांना, मान्यच आहे. पण ३८ वर्षं कुठल्याही व्यवसायात किंवा मनोरंजनाच्या व्यवसायांत कधीही कंबरेखालचे विनोद न करता, नाटकाशी , नाटकाला आलेल्या प्रेक्षकांशी प्रामाणिक राहून, काम करणं सोप्पं नाही हो. नट म्हणून समोरच्या नटाचा विनोद न मारता त्याचाही हूरुप वाढवणं, समोरच्या नटाच्या विनोदालाही मोठं करणं फार फार अवघड आहे”.
पुढे त्याने लिहिलं आहे की, “निर्माता म्हणुन तरुण पोरांच्या पाठीशी ऊभं रहाणं हे ही सोप्पं नाही. माणूस म्हणुन पडत्या काळांत रंगमंच कामगारांचं स्वखर्चाने घर भरणं हे तर त्याहून सोपं काम नाही. महाराष्ट्र नाही भारतभर… भारत नाही तर जगभर जिथे जिथे म्हणून मराठी लोक राहतात तिथे तिथे जाऊन प्रयोग करणं , तिथल्या माणसांना नाटकाशी जोडून ठेवणं किती अवघड. मी त्या क्षेत्रांत फारच नवा आहे, पण लाखो किलोमिटरचा प्रवास, जागरणं करुन, न थकता, न कंटाळता एका प्रयोगांत ३ तास फ्रेश दिसणं किती अवघड आहे हे कळलंय मला. पण हा माणुस वयाच्या ६४व्या वर्षी आम्हाला लाजवेल असा ऊभा आहे हे कमाल आहे”.
शेवटी त्यानं लिहिलं, “माणुस नसताना त्याची किंमत करण्यापेक्षा तो असतांना त्याचं मोल कळणं फार आवश्यक असतं. पण ३ पिढ्यांचं रंगमंचावरून मनोरंजन करणारं हे मराठी वैभव आपल्या महाराष्ट्रांत आहे हे आपणच मिरवणं फार महत्वाचं आहे, नाही का? खूप शुभेच्छा Prashant Damle सर. तुम्ही फार मौल्यवान आहात! (Post च्या background ला असलेलं गाणं त्यांचं Fav आहे…)”.
