‘बिग बॉस’ मराठीच्या चौथ्या पर्वातून प्रकाशझोतात आलेली जोडी म्हणजे अभिनेत्री अमृता देशमुख व अभिनेता प्रसाद जवादे. या जोडीने ‘बिग बॉस’ मराठीमधून प्रेक्षकांच्या मनात आपली वेगळी जागा मिळवली. बिग बॉसचा हा सिझन गाजवल्यानंतर घरातून बाहेर पडून त्यांनी फोटो शेअर करत चाहत्यांना त्यांच्या प्रेमाची कबुली दिली. त्यानंतर त्यांनी लवकरच लग्न करणार असल्याचं सांगत चाहत्यांना आश्चर्याचा सुखद धक्का दिला होता. त्यामुळे ही जोडी आता लवकरच आयुष्यभराचे साथीदार बनणार आहेत. नोव्हेंबरचा लग्नाचा मुहुर्त ठरला असून नुकताच त्यांच्या चहा पोह्यांचा कार्यक्रमही थाटात पार पडला. लग्नापूर्वींच्या विधींनाही आता सुरुवात झाली आहे. त्यातील एक विधी म्हणजे केळवण. त्यांचे फोटो या जोडप्याने सोशल मीडियावर शेअर केले होते. आता त्यांनी नवीन एक फोटो इन्स्टाग्रामवर शेअर केला आहे. सध्या त्या फोटोची सोशल मीडियावर बरीच चर्चा रंगली आहे. (Prasad amruta share new house glimps)
अमृता व प्रसाद नोव्हेंबरच्या १८ तारीखेला विवाहबंधनात अडकणार आहेत. त्यांच्या चाहत्यांना त्यांच्या लग्नाची उत्सुकता तर लागून आहेच पण त्यापेक्षा जास्त नुकताच त्यांनी शेअर केलेल्या इन्स्टाग्रामवरील फोटोबाबत आणखीनच उत्सुकता वाढली आहे. अमृता व प्रसादने त्यांच्या नवीन घराचे फोटो शेअर केले आहेत. या फोटोंमध्ये ते दोघं एकमेकांबरोबर घराच्या बाहेर उभे असलेले दिसून येत आहेत. दरवाजाही खूप छान प्रकारे सजवण्यात आला आहे.
झेंडूच्या फुलांचं व आंब्याच्या पानांचं तोरण लावून पारंपारिक पद्धतीने प्रवेश दरवाजा सजवला आहे. घरात दसरा स्पेशल पूजाही केली आहे. या सगळ्यात प्रवेशद्वाराच्या बाजूला लावलेल्या नावांच्या पाट्यांवर सर्वात जास्त लक्ष केंद्रित करतो आहे. त्यांच्या बिग बॉसच्या घरातील नावाच्या पाट्या त्यांच्या घराबाहेर नेमप्लेट म्हणून लावल्या आहेत.
त्यांच्या जोडीला तर चाहत्यांकडून भरभरून प्रेम मिळतच असतं. पण या फोटोंना आणि त्या नेमप्लेटला चाहत्यांकडून विशेष प्रेम मिळत आहे. या फोटोंवरही चाहत्यांनी लाईक व कमेंटचा वर्षाव केला आहे. एका नेटकऱ्याने लिहीलं, ‘त्या नावाच्या अधिक शोभा देत आहेत’. तर दुसऱ्या नेटकऱ्याने, ‘एकदम नारंगी, पिवळ्या झेंडूची फुलांसारखेच तुम्ही दिसतात’, असं लिहीत त्यांनी या जोडप्याचं कौतुक केलं आहे.