२०१९ मध्ये ओटीटी फ्लॅटफॉर्मवर ‘मेड इन हेवन’ नावाची वेबसीरीज प्रेक्षकांच्या भेटीला आली होती. या सीरिजच्या पहिल्या सीझनला प्रेक्षकांचा उत्तम प्रतिसाद मिळाला होता. त्यानंतर या वेबसीरिजचा दुसरा सीझन नुकताच प्रदर्शित झाला आहे. त्यालादेखील चांगला प्रतिसाद मिळत आहे. अर्जुन माथूर, शोभिता धुलिपाला, जिम सरभ, राधिका आपटे अशी तगडी स्टारकास्ट या वेबसीरीजमध्ये झळकली आहे. मात्र याच वेबसीरिजमधील एका एपिसोडची सध्या जास्त चर्चा होत असून अनेकांनी या एपिसोडचे कौतुक केले आहे. (prakash ambedkar on radhika apte marriage scene in made in heaven s2)
या वेबसीरिजमधील पाचव्या एपिसोडमध्ये अभिनेत्री राधिका आपटेने वकील असणाऱ्या एका बहुजन मुलीची व्यक्तिरेखा साकारली आहे. पुढे या पात्राचा आंतरजातीय विवाहसोहळा दाखवण्यात आला असून ज्यात ती तिच्या होणाऱ्या पतीसोबत बौद्ध पद्धतीने विवाह करण्यात आल्याचे यामध्ये दाखवण्यात आले आहे. राधिका आपटेवर चित्रित करण्यात आलेल्या या एपिसोडचे काही व्हिडिओज सोशल मीडियावर व्हायरल झाले आहे. चाहते व नेटकऱ्यांना हा एपिसोड प्रचंड भावला असून सोशल मीडियावर विविध प्रतिक्रिया देत कौतुक करत आहे.
हे देखील वाचा – ११वेळा ऑपरेशन्स, गंभीर आजार, हाडांची मोडतोड अन्…; सुप्रसिद्ध मराठमोळ्या अभिनेत्याची झालीय अशी अवस्था, म्हणाले, “मृत्यूशी लढाई…”
हा एपिसोड पाहिल्यानंतर डॉ. बाबासाहेब आंबेडकर यांचे नातू प्रकाश आंबेडकर यांनी एक ट्वीट करत अभिनेत्रीच्या व्यक्तिरेखेचे कौतुक केले आहे. प्रकाश आंबेडकर यांनी त्यांच्या ट्विटर हँडलवर एपिसोडमधील दोन फोटो शेअर केले आहेत. हे फोटोज शेअर करताना प्रकाश आंबेडकर म्हणाले, “मला पल्लवी या स्त्री पात्राचा दृढनिश्चय, तिचा विरोध आणि प्रतिकार खूप आवडला. ज्यांनी हा एपिसोड पाहिला आहे त्या वंचित आणि बहुजनांना माझं सांगणं आहे की, तुमची ओळख पटवा आणि मगच तुम्हाला राजकीय महत्त्व प्राप्त होईल. जसे पल्लवी म्हणते त्याप्रमाणे, ‘सर्व काही राजकारणाबद्दल आहे.'”
‘मेड इन हेवन’ या वेबसीरीजची निर्मिती फरहान अख्तरने केली असून त्याचे दिग्दर्शन झोया अख्तरने केले आहे. १० ऑगस्टला या वेबसीरीजचा दुसरा सीझन ‘ॲमेझॉन प्राईम व्हिडिओ’ या ओटीटी फ्लॅटफॉर्मवर प्रदर्शित झाला आहे. (made in heaven season 2)