‘झी मराठी’ वाहिनीवरील सर्वच मालिकांना प्रेक्षक भरभरुन प्रतिसाद देत आहेत. अशातच काही दिवसांपूर्वी सुरु झालेल्या पारू या मालिकेचा प्रवासही उत्तम सुरु असलेला पाहायला मिळत आहे. ‘पारू’ मालिकेच्या कथानकाने आणि मालिकेतील कलाकारांनी प्रेक्षकांची मन जिंकली आहेत. सध्या मालिकेत पारूचा ब्रँड अँबेसेडर होण्याचा प्रवास पाहायला मिळत आहे. तर एकीकडे पारूच्या लग्नाची लगीन घाई सुरु असताना त्यात खूप मोठं विघ्न आलेलं पाहायला मिळत आहे. पारूच्या वडिलांच्या ओळखीने त्यांनी पारुसाठी एक स्थळ आणलेलं असतं. (Sachin deshpande on sharayu sonavane)
पारुसाठी आणलेलं हे स्थळ म्हणजे दिशा व दामिनीने आखेलला डाव असतो. मालिकेत पारूच्या होणाऱ्या नवऱ्याच्या भूमिकेत अजय म्हणजेच सचिन देशपांडेला पाहणं रंजक ठरत आहे. याआधीही सचिनने बऱ्याच मालिकांमधून नकारात्मक भूमिका साकारत प्रेक्षकांची मन जिंकली. अशातच काही दिवसांपूर्वी सचिनने पारू मालिकेत पदार्पण केलं मात्र आता सचिनची ही भूमिका मालिकेचा निरोप घेणार असल्याचं एका पोस्टवरुन समोर आलं आहे.
सचिनने ही पोस्ट खास शरयू सोनावणे म्हणजेच पारूसाठी लिहिली आहे. सुरुवातीला चांगलं रूप घेऊन आलेला अजय मात्र कालांतराने त्याचा खरा चेहरा मालिकेत दाखवतो आणि पारूला त्रास देताना दिसतो. त्यामुळे मालिकेचे प्रेक्षकही अजयवर नाराज असलेले पाहायला मिळाले. मात्र अजय हा खरा आयुष्यात उत्तम माणूस असून त्याने ऑन स्क्रीन पारुला झालेल्या दुःखामुळे तिच्यासाठी खास पोस्ट लिहत तिची माफी मागितली आहे.
पारूबरोबर चा फोटो शेअर करत सचिनने असं म्हटलं आहे की, “गेला दीड आठवडा मी या गोड मुलीला ऑनस्क्रीन फार त्रास दिला. पण ऑफस्क्रिन आम्ही खुप छान मित्र झालो, तसं काम फार दिवसांच नव्हतं, पण जे काही उपद्व्याप करायचे होते त्यासाठी शरयूने कम्फर्टेबल असणं फार गरजेचं होतं, पण उलट तिनेच मला कम्फर्टेबल केलं. शरयू बघ मी तुझ्याबद्दल सगळं चांगल बोललो आहे. आता तरी लुडोमध्ये चीटिंग करु नकोस. आता नवीन काम, नवीन भूमिका घेऊन लवकरच तुमच्या समोर येतो. सगळ्यांना खूप प्रेम”. सचिनच्या या पोस्टवर शरयू म्हणजेच पारूनेही कमेंट केली आहे. शरयू म्हणाली आहे की, “तू चांगलाच आहेस डूचकांडे. आणि मी लुडो न चीटिंग करता खेळले आहे”, असं म्हटलं आहे.