Nora Fatehi Accident : बॉलिवूडची लोकप्रिय अभिनेत्री आणि उत्तम डान्सर म्हणून ओळखली जाणारी नोरा फतेही शनिवारी मुंबईत एका अपघातात जखमी झाली. पश्चिम उपनगरातील आंबोली परिसरातील लिंक रोडवर हा अपघात घडला असून, नोराच्या कारला एका मद्यधुंद चालकाने जोरदार धडक दिल्याची माहिती समोर आली आहे. सुदैवाने या अपघातात नोरा फतेहीला गंभीर दुखापत झाली नसून तिला किरकोळ जखमा झाल्या आहेत.
मिळालेल्या माहितीनुसार, नोरा फतेही एका कार्यक्रमासाठी, म्हणजेच सनबर्न फेस्टिव्हलमध्ये सादरीकरण करण्यासाठी जात असताना हा अपघात झाला. अपघात होताच तिला तात्काळ जवळच्या रुग्णालयात दाखल करण्यात आलं. डॉक्टरांनी प्राथमिक उपचार केल्यानंतर तिची प्रकृती स्थिर असल्याचं सांगितलं. नंतर डॉक्टरांनी तिची सीटी स्कॅन तपासणी देखील केली, ज्यामध्ये कोणतीही गंभीर अंतर्गत दुखापत नसल्याचं स्पष्ट झालं.
आणखी वाचा – “ओळख करून देण्याची ही कोणती पद्धत?…”, होणाऱ्या सूनेवर भडकली सुप्रसिद्ध अभिनेत्री; कारण…
या घटनेनंतर पोलिसांनी तात्काळ कारवाई करत धडक देणाऱ्या चालकाला ताब्यात घेतलं. सदर चालक हा २७ वर्षीय युवक असून तो अपघाताच्या वेळी मद्याच्या अमलाखाली असल्याचं पोलिसांनी सांगितलं आहे. मुंबई पोलिसांनी त्याला अटक करून पोलीस कोठडी सुनावली आहे. अपघातानंतर काही तासांनी नोरा फतेहीने सोशल मीडियावर एक व्हिडीओ शेअर करत या संपूर्ण घटनेबाबत प्रतिक्रिया दिली. तिने सांगितलं की, धडकेनंतर तिचं डोकं गाडीच्या खिडकीवर आदळलं आणि ती प्रचंड घाबरली होती. मात्र सध्या ती सुरक्षित असून तिची तब्येत ठिक असल्याचंही तिने स्पष्ट केलं.
आणखी वाचा – साऊथ अभिनेत्याचे वयाच्या ६९व्या वर्षी निधन, रजनीकांत यांनी गमावला जवळचा मित्र, सिनेसृष्टीवर शोककळा
यावेळी नोराने नागरिकांना मद्यपान करून वाहन चालवू नये, असं आवाहन केलं. मद्य आणि अंमली पदार्थांमुळे अपघात होण्याचं प्रमाण वाढत असल्याबद्दल तिने चिंता व्यक्त केली. “लोकांनी मद्यधुंद अवस्थेत वाहन चालवू नये, ही गोष्ट पुन्हा पुन्हा सांगावी लागते याचं मला वाईट वाटतं,” अशा शब्दांत तिने आपली भावना व्यक्त केली. या घटनेनंतर नोराच्या चाहत्यांनी तिच्या प्रकृतीसाठी सोशल मीडियावर चिंता व्यक्त करत लवकर बरी होण्यासाठी शुभेच्छा दिल्या आहेत.
