नाना पाटेकर यांनी एका इसमाला फटकावल्याचा एक व्हिडीओ सध्या सोशल मीडियावर चांगलाच व्हायरल झाला आहे. या व्हिडीओवरून नाना टीकेचे धनी झाले आहेत. चित्रीकरणादरम्यान एका इसमाला नानांनी जोरात कानशिलात लावली असल्याचा तो व्हिडीओ नेटकऱ्यांच्या तावडीत सापडला आहे. सेल्फी काढण्यासाठी आलेल्या चाहत्याला रागाच्याभरात जोरदार टपली मारली. हा वाद भलताच चिघळला आणि नानांनी या व्हायरल व्हिडीओवरून स्पष्टीकरण देत आपलं मत मांडलं. (Nana Patekar Viral Video)
त्यानंतर एका मुलाखतीत नानांनी फटकावलेल्या त्या इसमाने दिलेली प्रतिक्रिया सध्या चर्चेत आहे. या व्हिडीओ प्रकरणावरून तो मुलगा म्हणाला की, “माझं नाव राज सुनकर आहे. मी बनारसमधील तुलसीपूर इथे राहतो. मी आंघोळ करण्यासाठी गेलो होतो, पण त्यावेळी माझी नजर शूटिंगच्या ठिकाणी पडली. तिथे नाना पाटेकर होते. मी काही वेळ थांबून वाट पाहिली आणि नंतर त्यांच्याजवळ जाऊन फोटो मागितला. पण त्यांनी फोटो देण्यास नकार दिला आणि मला मारुन तिथून पळवलं”. त्या मुलाने पुढे सांगितलं, की मला सिनेमात कोणतीही भूमिका मिळाली नाही. त्यामुळे या घटनेनंतर माझ्या संपूर्ण परिसरात माझा अपमान झाला. मी मार खाल्ला आणि तिथून निघून गेलो”.
नाना पाटेकरांचा मोठा चाहता असलेल्या या मुलाने सांगितलं असंही सांगितलं की, “मी नाना पाटेकरांचा मोठा चाहता आहे. ज्यावेळी मी त्यांना पाहिलं त्यावेळी मला आधी विश्वास बसत नव्हता. पण नंतर आणखी जवळ जाऊन पाहिल्यानंतर मला हे नाना पाटेकर असल्याचा विश्वास बसला. मी त्यांच्याकडे फोटो काढण्यासाठी जात असताना त्यांच्या सुरक्षारक्षकांनी मला थांबवलं होतं, पण मी त्यांचा मोठा फॅन आहे त्यामुळे मी न थांबता त्यांच्याबरोबर फोटो काढण्यासाठी पुढे गेलो. पण त्यांनी मला मारलं. या प्रकरणी कोणतीही कारवाई होऊ नये”.
नानांनी या व्हिडीओवरून स्पष्टीकरण देत म्हटलं आहे की, “या व्हिडीओमधील मुलगा नक्की कोण होता? हे मला माहित नव्हते. मला तो मुलगा आमच्याच टीममधला मुलगा वाटला आणि आम्ही आधी २ वेळा रिहर्सल केल्याप्रमाणे आणि दिग्दर्शकाने सांगितल्यानुसार मी त्याला कानाखाली मारली. पण ज्याला मारलं तो टीममधील नसून दुसराच कुणीतरी होता, हे मला नंतर कळलं. यानंतर मी त्याला शोधले पण तेवढ्यात तो तिथून पळून गेला होता आणि हा व्हिडिओ त्याच्या मित्राने शूट केला असण्याची शक्यता आहे”.
